د بغلان په بنو ولسوالۍ کې نن د یو سراچه ډوله موټر د چپه کيدو له کبله څلورو تنو ته مرګ ژوبله اوښتې ده. د بغلان د ترافیکو مدیر قاري محمد نذیرعابدي وايي چې یو سراچه ډوله موټر د بغلان د بنو ولسوالۍ په لور روان و چې د دې ولسوالۍ د خوشدرې کلي اړوندو کې له واټ څخه وتلی او د انداراب سیند ته لوېدلی دی. د هغه په خبره چې د پېښې له امله ۲ تنه وژل شوي او ۲ نور ټپيان شوي دي. ټپيان د خنجان ولسوالۍ روغتيايي کلينيک ته لېږدول شوي چې روغتيايي وضعيت يې د ډاډ وړ بلل شوی.
