د ملي امنیت شورا وايي چې تېره ورځ یې له څرخي پله او په هېواد کې له نورو زندانونو د طالبانو نږدې ۷۱۰ کسه بندیان خوشي کړي دي او دا لړۍ به نن هم دوام ولري. د ملي امنیت شورا د سلاکار ددفتر ویاند جاوید فیصل وایي، د ولسمشر د حکم د تطبیق او دوه زره طالب زندانیانو د خوشي کولو لپاره به دغه لړۍ روانه وي. دده په خبره ۷۱۰ زندانیان یې ازاد کړي دي او په راتلونکو ورځو کې به دغه شمېره تر دوه زرو پورې رسوي. بلخوا طالبانو هم په بلخ، کندز، لوګر، پکتیا، پکتیکا او خوست ولایتونو کې د افغان حکومت ۷۳ بندیان خوشي کړي. افغان حکومت وايي د زندانیانو له خوشي کولو یې موخه دا ده چې د سولې پروسې لپاره شته خنډونه له منځه لاړ شي او په دې توګه روانه جګړه پای ومومي.
