سیلابونه؛ د لوګر په خوشي کې پنځوسو کسانو ته مرګ ژوبله اوښتې ده

د لوګر سيمه ييز مسوولین وايي، چې د تېرې ورځې له سخت اورښت وروسته د دغه ولايت په مرکز پل علم، خوښۍ او محمداغې ولسوالیو کې سېلابونه راوتلي چې درانه ځاني او مالي زيانونه یې اړولي دي. د لوګر د والي ویاند عمر وايي، سېلابونو تر ټولو ډېر زيان په خوښۍ ولسوالۍ کې اړولی چې له امله يې د ښځو او ماشومانو په ګډون ۲۰ کسان مړه، ۳۰ ټپیان او څلور نور نادرکه شوي دي. هغه زياته کړه، سېلابونو په يادې ولسوالۍ کې شاوخوا ۳ زره کورونه نړولي او ۲ زره څاروي یي هم مړه کړي دي. دی وايي، د ولايتي ادارې په هلوځلو تېره شپه سلګونه کورنۍ د سېلاب له سيمو څخه خوندي سيمو ته لېږدول شوي او په پام کې ده چې د سېلابونو له امله زیانمنې شوې کورنۍ د خوښۍ ولسوالۍ مقام ته څېرمه په یوه کمپ کې ځای پر ځای شي. بلخوا د طبعي پېښو پر وړاندې د چمتووالي وزارت مرستيال مولوي شرف الدین مسلم په یوه ویډيويي پيغام کې ويلي چې د تېرې ورځې له اورښت وروسته په لوګر، میدان وردګ، غزني، ننګرهار او لغمان ولايتونو کی سېلابونه راوتلي خو د سر زيان په پرتله یې مالي زيانونه زيات دي.