پرون د اورکم اونۍ لومړۍ ورځ وه چې په ټول هېواد کې په ښه ډول تېره شوه. یوازې په ځینو ولایتونو کې د وړو نښتو رپوټونه ورکړل شوي چې په هغو کې هم له نېکه مرغه مرګ ژوبله نه ده رامنځ ته شوې. دواړه اړخونه په دفاعي حالت کې دي او یو پر بل بریدونه نه کوي. دا ګام د خلکو له پراخ هرکلي سره مخ شوی او له یوې اونۍ د زیات دوام غوښتنه یې کوي.
دوه کاله وړاندې له درې ورځني اوربند وروسته دا لومړی ځل دی چې پر اورکم توافق شوی او ټول اړخونه ژمن دي چې پر توافق به عمل کوي. ټاکل شوې د همدې اونۍ په پای کې د امریکا او طالبانو تر منځ د سولې هوکړه لیک لاسلیک شي. که په دې اونۍ کې د اورکم توافق په ښه ډول عملي شي، نو له شک پرته چې دا به یو بې ساری پرمختګ وي چې ورسره به د سولې هوکړه لیک دا پرمختګ لا زیات مهم او ګټور کړي.
داسې ښکاري چې د طالبانو او امریکا تر منځ د سولې هوکړه لیک به له کومې ستونزې پرته لاسلیک شي، خو بین الافغاني خبرو ته لا هم زیاتې اندېښنې شته. دولتي لوری پاشل کېږي، په حکومت کې د ننه او له حکومت څخه د باندې سیاسي اختلافات په بې ساري ډول زیات شوي دي. پرون د ثبات او همپالنې ټیم د سرپل لپاره خپل نوی والي معرفي کړ، د پنجشیر والي اعلان وکړ چې نور د اشرف غني حکم نه مني او د عبدالله ملاتړ کوي. په بغلان کې هم د والي پر سر لانجې وې او ښار نظامي بڼه خپله کړې وه. وېره ده چې په راتلونکو ورځو کې به دا حالت لا زیات ترینګلی شي. که له یوه اړخه اورکم او د سولې په برخه کې خلک پرمختګونو ته خوښ دي، له بله اړخه د ټاکنو د پایلو د اعلان له امله رامنځ ته شوې لانجې خلک اندېښمن کړي دي. دا داسې وخت و چې نه یوازې دا اختلافات باید نه وی، بلکې حکومت له سیاسي ګوندونو او سیاستوالو سره په ګډه یو داسې واحد دریځ خپل کړی وی، چې د سولې له راتلونکو بین الافغاني خبرو او د رښتینې سولې له راتګ سره یې مرسته کړې وی. پکار وه چې د مسخرو او نامشروع ټاکنو پایله په دې وخت کې نه وی اعلان شوې، اوس باید حکومت، سیاسي ګوندونه، سیاستوال، مدني ټولنې او نور فعالین سره ناست وی، د بین الافغاني خبرو لپاره یې ګډ پلاوی ټاکلی وی، پر دې یې بحث او خبرې اترې کړې وی چې څه ډول اورکم پر اوربند اړولی او دوام ورکولی شي. دوی باید سره له اوسه پر ټولو هغو ننګونو او ګواښونو بحث کړی وی او حللارې یې ورته موندلې وی چې د بین الافغاني خبرو بریا ننګوي او له ستونزو سره یې مخ کوي.
اوس هم وخت دی؛ پکار ده چې د ټاکنو مسخره لوبه ختمه شي او نور ټول پر واحد دریځ را ټول شي، پر سوله تمرکز وکړي او د افغانستان د بقا او د سولې دا چانس ضایع نه کړي.