افغان حکومت د وارداتي برېښنا په اړه ازبکستاني چارواکو سره خبرې کړې

د ا.ا د بهرنیو چارو وزارت سیاسي معیین د افغانستان لپاره د ازبکستان ځانګړي استازي عصمت الله ایرګاشوف سره له ازبکستان څخه د وارداتي برېښنا په لېږد کې د ستونزو په اړه ټليفوني خبرې کړې دي. د بهرنیو چارو وزارت وایي، په دې خبرو کې د بهرنیو چارو وزارت سیاسي مرستیال له ازبک لوري غوښتي چې د وارداتي برېښنا کچه هغې اندازې ته ورسوي چې د دواړو هېوادونو ترمنځ پرې وار د مخه هوکړه شوې ده. سرچینه کاږي په دې خبرو کې د عصمت الله ایرګاشوف هم ياده ستونزه منلې او زياته کړې یې ده چې په دې تړاو يې د ازبکستان د برېښنا له وزارت سره خبرې کړي او هغوی د يادې ستونزې لامل په ازبکستان کې د سړې هوا په رارسېدو سره د برېښنا کمښت او هم ځينې تخنيکي ستونزې يادې کړي دي. ایرګاشوف ویلي، چې د دوی د هڅو په پايله کې افغانستان ته د برېښنا د لېږد کچه یو څه لوړه شوې ده او هڅه کوي چې افغانستان ته د برېښنا کچه لا زياته شي. دا په داسې حال کې ده چې له تېرې یوې اونۍ راهیسې د کابل په ګډون په ۱۱ نورو ولایتونو کې د برېښنا پر چاوۍ له امله خلک له سختو ستونزو سره لاس او ګرېوان دي.