د پاکستان له زندانونو ۴۰ نور افغانان خوشې شول

د کډوالو چارو وزارت د پاکستان د سیند ایالت له زندان څخه د ۴۰ افغانانو د خوشې کېدو خبر ورکړی دی. یاد وزارت نن ویلي چې په ازادو شوو افغان بندیانو کې څلور افغان کورنۍ هم شاملې دي. په بیان کې ویل شوي چې دغه افغانان په اسلام اباد کې د افغانستان سفارت او کډوالو اتشې په هڅو خوشې شوې دي. د کډوالو چارو وزارت ویلي چې د پاکستان له زندان څخه تازه خوشي شوي افغانان به د سپین بولدک ـ چمن له لارې هېواد ته ولېږدول شي. په دغه اعلامیه کې ویل شوي چې د پاکستان د لندي او پچه زندانانونو څخه د ۱۶۰ نورو افغان کډوالو خلاصولو هڅې هم روانې دي. دا په داسې حال کې ده چې د ا.ا حکومت په دې وروستیو کې د پاکستان له زندانونو څخه د سلګونو افغانانو د خوشي کېد خبر ورکړی دی. د پاکستان حکومت د یادو افغانانو د نیول کېدو لامل د هغوی د قانوني اسنادو نه لرل یاد کړي دي.