په بادغیس او بامیانو کې د ترافیکي پېښو له امله څلور تنه مړه شوي

په بادغیس ولایت کې د یوه موټر د چپه کېدو له امله درې تنه مړه شوي دي. د یاد ولایت د امنیې قومندانۍ مطبوعاتي دفتر په یوې خبرپاڼه کې ویلي چې دغه باروړونکی موټر د قلعه‌نو – هرات لویې لار کې چپه شوی چې د موټر چلوونکي په ګډون درېوو کسانو په‌کې ژوند بایللی دی. په خبرپاڼه کې همداراز د پېښې لامل د موټر چلوونکي بې‌احتیاطي او د موټر لوړ سرعت ښودل شوی دی. بل‌خوا د بامیانو سیمییز چارواکي هم وايي چې دغه ولایت کې د یوې ترافیکي پېښې پرمهال یوه کس خپل ژوند له لاسه ورکړی دی. پېښه د بامیانو مرکز اړوند سیمه کې نن سهار رامنځته شوې ده.