علومو اکاډمۍ د کرنیزو محصولاتو پروسس په اړه علمي سیمنار جوړ کړ

د افغانستان علومو اکاډمي «اقتصادي وده کې د کرنیزو محصوولاتو د پروسس رول» تر نوم لاندې یو ورځنی علمي او څېړنیز سیمنار جوړ کړ. د علومو اکاډمۍ سرمحقق مرستیال محمدطاهر رسولي یاد علمي سیمنار کې وویل، دا چې هېواد کې کرنیز محصولات په معیاري ډول نه پروسس کېږي، دې برخه کې د ننګونو مشخصولو او ورته د حل‌لارو لټولو لپاره یې دغه علمي او څېړنیز سیمینار جوړ کړی دی. د هغه په وینا، د کرنیزو محصولاتو د پروسس پر وړاندې د ستونزو د حل لپاره، د علومو اکاډمۍ ۲۱علمي او څېړنیزې مقالې چمتو کړي او اړوند بنسټونو ته یې استولي دي. د صنعت او سوداګرۍ وزارت یاد سیمنار ته په استولي پیغام کې ویلي، ټاکل شوې هېواد کې د کرنیزو محصولاتو د پروسس لپاره شپږ زونونه رامنځته شي.