فاروقي په نړیوال ۲۰ اوریز لیګ کې ترټولو زیاتې ویکټې اخیستې دي

په نړیوال ۲۰ اوریز سوداګریز لیګ کې فضل الحق فاروقي د زیاتو ویکټو په ترلاسه کولو سره لومړی مقام خپل کړی دی. نړیوال شل اوریز کرکټ لیګ چې په متحده عربي اماراتو کې ترسره کیږي، ۶ لوبډلې پکې برخه لري. په دې لیګ تېره شپه ۱۵ مه لوبه چې د ایم ای امارت او ډیسیرټ ویپیرز لوبډلو ترمنځ ترسره شوه، افغان توپ اچوونکي فارقي پکې د خپلې لوبډلې ایم ای امارت لپاره د ۲۳ منډو په ورکولو سره ۲ لوبغاړي وسوځول او په دې سره نوموړي په یاد لیګ کې د زیاتو ویکټو اخیستونکې په لیست کې هم لومړی ځای خپل کړ، چې په ۶ لوبو کې ۱۲ ویکټې ترلاسه کړې دي. په دې لیست کې دویم سریلانکایي لوبغاړی ټیکشانا دی چې ۱۱ ویکټې یې ترلاسه کړې او په دریم مقام کې نیوزیلینډۍ لوبغاړی ټرینټ بولټ دی، چې ۱۰ ویکټې یې ترلاسه کړې دي.