د اوبو او برېښنا وزارت په بغلان، پکتیا او نورستان ولایتونو کې د برېښنا د تولید د ځینو پروژو د عملي کیدو خبر ورکوي. د غه وزارت ویلي، د دې پروژو په بشپړېدو او د ترکمنستان د ۵۰۰ کیلو ولټ مزي د غځولو په اوږدو کې د نویو ستېشنونو په جوړېدو سره به په هېواد کې زرګونه کورنۍ له برېښنا برخمنې شي. له بلې خوا هغه خلک چې د دغو پروژو په مسیر کې ژوند کوي، د اوبو او برېښنا وزارت څخه د دې پروژو د کار د چټکتیا غوښتنه کوي. دا په داسې حال کې ده چې د اوبو او برېښنا وزارت د شمېرو له مخې په ټول هېواد کې تر لسو ډېر د اوبو بندونه شته چې، د اوبو د مدیریت تر څنګ برېښنا هم تولیدوي او زرګونه کورنۍ ترې د برېښنا ګټه پورته کوي.
