له میاشتو ځنډ وروسته افغان حکومت ځان بین الافغاني خبرو ته یو ګام نور هم نږدې بولي. پرون د سولې په تړاو رابلل شوې مشورتي لویې جرګې پرېکړه وکړه چې افغان حکومت باید د طالبانو پاتې زندانیان ازاد کړي او ژر تر ژره دې بین الافغاني خبرې پيل شي. د جرګې غړو همدا راز د اوربند، د جګړو د کمېدو، رښتیني سیاسي جوړجاړي او لاس ته راوړنو پر ساتلو هم ټینګار وکړ. ولسمشر غني هم ژمنه وکړه چې زندانیان به خوشي کوي او پخواني ولسمشر بیا سوله د هر افغان هیله وبلله.
د سولې په اړه مشورتي لویې جرګې په کابل کې درې ورځې دوام وکړ. په پای کې پنځوسو کمېټو 25 مادهییز پرېکړه لیک صادر کړ. په پرېکړهلیک کې راغلي چې د بین الافغاني خبرو د پیل، د سولې د راتګ، جګړو د ختمېدو او روان ناورین د پای لپاره باید د طالبانو پاتې زندانیان ازاد شي. د جرګې غړو همدا راز په دغه پرېکړهلیک کې ویلي چې د تېرو کلونو لاس ته راوړنې دې وساتل شي، طالبان دې په رښتینې توګه له جګړو لاس واخلي او له افغان حکومت سره دې خبرې پيل کړي، نړیواله ټولنه دې د هوکړې ضمانت وکړي او همدا راز افغان حکومت دې هم له خپل لوري د سولې لپاره نرمښت وښيي.
د پرېکړهلیک تر لوستلو وروسته ولسمشر غني په خپلو خبرو کې وویل چې د دغو زندانیانو خوشي کول د ده له صلاحیت لوړ وو، نو دا چې د جرګې غړو پرېکړه کړې ده، دی به هم ژر تر ژره د څلور سوو پاتې طالب بندیانو د خوشي کولو فرمان هم لاسلیک کړي. په دې کې هغه بندیان دي چې تر ډېره د جنایي جرمونو او حق العبد له امله په زندانونو کې پاتې دي، خو طالبان یې د خوشي کولو غوښتنه کوي. ولسمشر په خپلو خبرو کې وویل: ((زه به نن هغه حکم امضا کړم چې ما په ژوند کې نهشو لاسلیکولی، ځکه زما تر صلاحیت لوړ و، اوس به یې ستاسو په اجماع امضا او دوی به خوشې کړم)).
ولسمشر همدا راز په خپلو څرګندونو کې وویل چې اوس د طالبانو وار دی او باید تاوتریخوالی کم کړي او سرتاسري اوربند ته غاړه کېږدي. د ولسمشر په خبره جرئت په سوله او جرئت په اوربند کې دی، نو طالبان دې د جګړو پر ځای له افغان حکومت سره په ټول هېواد کې اوربند وکړي، څو په دې حساسو شرایطو کې حکومت د خپلو خلکو لاسنیوی وکړي او په ګډه د هېواد د ښېرازۍ لپاره کار وشي.
د دې تر څنګ پخواني ولسمشر حامد کرزي هم د جرګې له غړو مننه وکړه چې د سولې لار یې خلاصه کړه او افغانان یې یو ګام نور هم بین الافغاني خبرو ته نږدې کړل. هغه پر طالبانو غږ وکړ چې نور دې جګړه ودروي او د خبرو له لارې دې د دایمي ثبات او سولې لپاره زمینه برابره کړي. حامد کرزي زیاته کړه چې دلته روانه جګړه پردۍ جګړه ده او باید ژر تر ژره پای ته ورسول شي.
د ملي مصالحې عالي شورا مشر او د سولې مشورتي جرګې رییس ډاکټر عبدالله عبدالله هم وویل چې افغانان یو ګام نور هم بین الافغاني خبرو ته نږدې شول او د سولې په لار کې یو بل خنډ هم له منځه یووړل شو. هغه هیله څرګنده کړه چې په راتلونکو دریو ورځو کې به بین الافغاني خبرې پيلېږي.
بلخوا طالب وسله والو بیا د حکومت له لوري د زندانیانو پر خوشي کېدو غبرګون ښودلی او د دې پرېکړې هرکلی یې کړی دی. د طالبانو د قطر دفتر ویاند سهیل شاهین ویلي همدا چې د دوی پاتې څلور سوه بندیان خوشي شي، نو په یوه اونۍ کې به د بین الافغاني خبرو لپاره چمتو وي. تر دې وړاندې افغان حکومت بیا ویلي وو چې د زندانیانو تر خوشي کېدو درې ورځې وروسته به له طالبانو سره مخامخ خبرې پيلېږي.
