کابل؛ څوارلس راکیټي بریدونو لس ملکیان ټپیان کړي دي

کورنیو چارو وزارت وایي چې پر کابل ښار له بېلو خواوو څوارلس راکټ توغول شوي دي. د کورنیو چارو وزارت ویاند طارق آرین له سپوږمۍ راډیو سره په خبرو کې وویل چې نن سهار څه کم لس بجې د کابل ښار د لومړۍ، دویمې، لسمې او شپاړسمې حوزې په مربوطاتو کې راکیټي بریدونه شوي دي. دده په خبره دغه راکټونه ټول د عامو وګړو پر کورونو لګېدلي چې لس کسه یې ټپیان کړي دي. په ټپیانو کې څلور ماشومان او یوه مېرمن شامل دي. بلخوا ویل کېږي چې له دې راکټونو یو یې په ارګ کې د تشریفاتو ریاست له ودانۍ سره لګېدلی دی او اووه کسه یې ټپیان کړي دي. دغه خبر حکومتي چارواکو نه دی تایید کړی. تر اوسه کومې ډلې د بریدونو مسوولیت نه دی منلی.