اروپايي ټولنه: له افغان زلزله‌ځپلو سره مو مرستې ډېرې کړې دي

اروپايي ټولنې پر خپله اېکس پاڼه اعلان کړی، چې د افغانستان په ختیځ کې یې له زلزله‌ځپلو سره مرستې ډېرې کړې دي. یاد بنسټ زیاته کړې، چې تر اوسه یې زلزله‌ځپلو سیمو ته په څلورو الوتنو کې څه باندې ۲۶۰ ټنه بېړنۍ بشردوستانه مرستې لېږلې دي. د یاد بنسټ په خبره، پر مرستو بار وروستۍ الوتکه پرون رسېدلې او ژر به افغانستان ته ډېرې نورې مرستې هم ورسېږي. پرون په افغانستان کې د ملګرو ملتونو د بشري مرستو همغږي کوونکي دفتر (اوچا) ویلي چې د هېواد په ختیځ کې زلزله‌ځپلي سرپناه، خوړو، درملو، پاکو اوبو او روغتیايي خدماتو ته بېړنۍ اړتیا لري.