اروپايي ټولنې؛ له افغان سېلاب‌ځپلو سره ۵۰ زره یورو مرسته اعلان کړې

اروپايي ټولنې په افغانستان کې له وروستیو سېلاب‌ځپلو سره د مرستې لپاره ۵۰ زره یورو ځانګړې کړې دي. د راپور له مخې، دا مرسته به د سره صلیب نړیواله کمېټه او د سرې میاشتې له لارې زیانمنو شویو کورنیو ته ورسول شي. سرچینې ویلي، چې یاده بودیجه به د سرپناه، نغدي مرستو، د پاکو اوبو د برابرولو او روغتیايي خدمتونو لپاره وکارول شي. اروپايي ټولنې ویلي، د دې مرستې موخه د بشري غبرګون پیاوړتیا او په سېلاب‌ځپلو سیمو کې د زیانونو کمول دي. د مالوماتو له مخې، له دې مرستې سره په افغانستان کې د اروپايي ټولنې ټول مالي ملاتړ ۲۲۵ زره یورو ته رسېدلی دی.