په هېواد کې د وحشتونو او خونړیو بریدونو او پېښو په دوام وسله والو ترهګرو تېره ورځ په کابل پوهنتون کې خونړی برید وکړ. کابل پوهنتون د هېواد په کچه ستر علمي او اکاډمیک مرکز دی چې تر ډېره یې امنیتي تدابیر هم سخت دي، خو بیا هم وسله وال بریالي کېږي چې دغه مرکز ته د ننه شي او د پرونۍ خونړۍ پېښې سبب شي. افغان چارواکو بیا هم د تېر په څېر دغه پېښه وغندله او هغه یې وحشتناک عمل وباله. د ولسمشر لومړي مرستیال بیا وویل چې دغه پېښه په استخباراتي برخه کې د ښکاره کمزورۍ او ضعف په مانا ده.
پرون له غرمې مخکې په کابل پوهنتون کې زرګونه محصلین یوې چاودنې ووېرول. د پوهنتون ادارې له دوو دروازو محصلینو ته د وتلو امر وکړ او په لومړي سر کې داسې فکر کېده چې ښایي وړه پېښه وي او چاته تلفات وا نه وړي، زرګونه محصلین له دروازو او دېوالونو په تېښته بریالي شول، خو وروسته معلومه شوه چې وسله والو ګڼ محصلین د کابل پوهنتون په ستاژ مرکز کې برمته کړي دي. عیني شاهدان وایي چې وسله وال درې کسه وو، د یاد مرکز د شا لخوا چې دا لار د کابل پوهنتون له لیلیې سره وصلېږي، دغه مرکز ته راځي او دهلېز ته له ننوتو سره سم پر هر مخ کېدونکي کس ډزې کوي.
دوی څو ساعته په دغه مرکز کې وژل او ډزې کوي، تر دې چې ساعتونه وروسته ځانګړي ځواکونه سیمې ته رسېږي او د دوی پر ضد عملیات پيلوي. مازیګر مهال عملیات پای ته رسېږي او کورنیو چارو وزارت وایي چې د وسله والو په وژل کېدو سره دغه برید پای ته رسېدلی دی، دوی هم د وسله والو شمېر درې کسه ښودلی دی. د کورنیو چارو وزارت ویاند طارق آرین شاوخوا پنځه بجې په یوه خپاره کړي پیغام کې وویل: ((پر کابل پوهنتون د ترهګرو وحشتناک برید د دریو وسله والو په وژل کېدو سره پای ته ورسېد، ۱۹ کسه شهیدان دي او ۲۲ نور ټپیان شوي دي)). ځینو نورو سرچینو بیا رسنیو ته د مړو او ټپیان شمېر تر دې هم لوړ ښودلی دی. په دې ډله کې ټول تنکي ځوانان محصلین او د یاد مرکز خدمه شامله ده.
وسله والو طالبانو تر برید نیم ساعت وروسته په یوه پیغام کې وویل چې پر کابل پوهنتون په وروستي برید کې لاس نه لري، خو بلې کومې ډلې تر اوسه د برید مسوولیت نه دی منلی. ولسمشر غني د تل په څېر برید غندلی دی او په دې خبره یې ځان خلاص کړی چې ګواکې ترهګرو په هلمند کې ماتې خوړلې او په کابل کې د خپلې ماتې غچ اخلي.
د ولسمشر لومړي مرستیال بیا د لومړي ځل لپاره په دې اقرار کړی دی چې د افغان حکومت استخباراتي اداره او معلومات کمزوري دي. نوموړي دغه برید غندلی دی او زیاته کړې یې ده دا د طالبانو او د هغه د فکري لارویانو د فکر او جوړښت ویجاړي او وحشت ښيي. هغه وايي: ((پر کابل پوهنتون برید زموږ لپاره یوه استخباراتي ناکامي او انساني فاجعه ده. دا برید د طالبانو او د هغو د فکري لارویانو د وجدان مرداري ښيي، دا حمله نن او بل هېڅ وخت هېڅ ډول توجیه نه لري)).
امرالله صالح داسې مهال په حکومت کې د ناکامۍ خبره کوي چې له څو اونیو راهیسې د کابل د امنیت مسوول دی او هره ورځ د خپلو نوو پرېکړو په اړه معلومات خپروي چې تر ډېره د امنیت په ځای د ښار پر پاکولو او ترافیکي مسایلو راڅرخي.
نړیوالو هم پر کابل پوهنتون د تېرې ورځې برید په کلکو ټکو غندلی او هغه یې وحشیانه عمل بللی دی. ملګرو ملتونو، اروپایي ټولنې، ناټو او د بشري حقونو کمېسیون هم د دې برید د غندنې تر څنګ له ښکېلو اړخونو د تاوتریخوالي بندېدو او اوربند غوښتنه کړې ده.
په کابل پوهنتون کې داسې مهال وحشتناک او بې مخینې برید کېږي چې امریکا له طالبانو سره د سولې هوکړه لاسلیک کړې ده او تمه دا وه چې دا هوکړه به دلته د ځوانانو او ملکي وګړو د وژنې بهیر ختم کړي، خو اوس له دې بریدونو او خونړیو جګړو سره د سولې له هوکړې خلک ناهیلي شوي دي. د ولسي جرګې غړو تېره ورځ په عمومي غونډه کې د سولې پروسه د امریکا له لوري د افغانانو او نړیوالو د تېر ایستنې لوبه وبلله او په خبره یې خلیلزاد د یوه ماهر لوبغاړي په توګه پر روان وحشت پټه خوله دی خو یوازې د ټرمپ د بریا لپاره یې زرګونه افغانان د کمپاین او خونړیو پېښو قرباني کړل.
