ایران او ازبکستان؛ په افغانستان کې د تاوتریخوالي د کمېدو غوښتنه کړې ده

د افغانستان لپاره د ایران د حکومت ځانګړي استازي ابراهیم طاهریان د افغانستان لپاره د ازبکستان له ځانګړي استازي عصمت الله ارګاشیف سره کتلي دي. دواړو لورو په افغانستان کې اوسنی تاوتریخوالی او روانې جګړې د اندېښنې وړ بللې دي او دلته یې د تاوتریخوالي پر کمېدو ټینګار کړی دی. دوی ویلي د افغانستان جګړه یوازې د خبرو له لارې د ختمېدو وړ ده نو، ښکېلو لورو ته په کار ده چې د جګړې پر ځای مذاکراتو ته ادامه ورکړي او په دې توګه افغانستان ته دایمي سوله او ثبات راولي. ایران او ازبکستان په دې حساسو شرایطو کې د اوربند رامنځ ته کول د افغانانو لپاره تر ټولو مهمه اړتیا یاده کړې ده او له ښکېلو لورو یې غوښتي چې خبرو ته له دوام سره هممهاله دې اوربند رامنځ ته کړي او جګړې دې ودروي.