بهرنیو چارو وزارت پاکستان کې؛ د طالب مشرانو د ویډیوګانو په اړه اندېښنه ښودلې

بهرنیو چارو وزارت د هغې ویډیو په غبرګون کې چې په کې د طالبانو د ډلې مرستیال ملا عبدالغني برادر، په پاکستان کې ددې ډلې د غړو په یوه ټولنه کې خبرې کوي اندېښنه څرګنده کړې ده. په دغه ویډیو کې چې درې ورځې مخکې په ټولنیزو رسنیو کې خپره شوې، ملا برادر د کراچۍ د ښار په یو روغتون کې د طالب ټپیانو د لیدنې وروسته طالبانو ته وایي، چې ټول مشران يې پاکستان کې دي او د ټپیانو درملنه يې په هېواد ناممکنه ده. د بهرنیو چارو وزارت د یوې اعلامیې په خپرولو سره ویلي چې پاکستان ته د طالب استازو سفر هم هیله بخښونکی او هم د اندېښنې وړ دی. د بهرنیو چارو وزارت په اعلامیه کې د پاکستاني مشرانو سره د طالبانو د پلاوي کتنې ته په اشارې هیله څرګنده کړې چې په افغانستان کې د جګړې د پای ته رسېدو په لور عملي ګامونه پورته شي. خو په عین وخت کې په دې اعلامیه کې د طالبانو له کمپونو څخه د ملا برادر کتنه او د طالبانو په منځ کې د هغه وینا چې په کې یې د پاکستان په خاوره کې د طالبانو د مشرانو د شتون نه پرده پورته کوي، خپګان او اندېښنه څرګنده کړې ده.