د چين د دولتي شورا مطبوعاتي دفتر د جنورۍ په ۲۱مه نېټه د هېواد د اقتصاد د باکيفيته پرمختګ د لاسته راوړنو په تړاو يوه لړيزه خبري ناسته ترسره کړي او د تېر کال د توليدي چارو لاسته راوړنې يې د پاملرنې وړ بللې دي.
تېر کال د چين د ټولو صنايعو پرمختيایي ارزښت ۴۰ اعشاريه ۵ ټريليون يوانه و او د توليدي چارو پيمانې يې له تېرو مسلسلو پنځلسو کلونو راهیسې په نړۍ کې لومړی مقام نيولی دی.
د چين د دولتي شورا مطبوعاتي دفتر يادې لاسته رواړنې اسانې نه دي بللي او ويلي يې دي، چې دا د پېچلي کورني او بهرني چاپېريال پر وړاندې ترلاسه شوې دي.
د چين د صنايعو او معلوماتي ټکنالوژۍ وزارت مرستیال جانګ يون مينګ رسنيو ته ويلي، چې د چين اقتصاد د ستونزمن بهرني چاپېريال او د بهرنيو فشارونو او د کورنيو ستونزو د ډېرېدو په حال کې د ډېرو مشکلاتو په لرې کولو سره ثابت پرمختګ موندلی دی. نوموړي د چين صنعتي بنسټ ټينګ، وړتيا يې پياوړې او پرمختیايي امکانات يې ډېر یاد کړي او په خبره یې، د تولیدي چارو د عصريتوب، ځيرکتيا او زرغونتوب ګامونه يې هم چټک شوي دي.
د چين صنعتي بنسټ پر له پسې نور هم ټينګ شوی او پرمختیايي اېنجين يې لا پياوړی شوی دی.
د چين د تېر کال د لويو تجهيزاتو د توليدي چارو د زياتوالي ارزښت د وړم کال د همدې مودې په پرتله په سلو کې اووه اعشاريه اووه زياتوالی ښيي، د ټولو سترو صنايعو د پرمختګ خدمتي انډول يې په سلو کې ۴۶ اعشاريه ۲ ته رسېدلی او د عصري تخنيک لرونکو تصديو د تولیدي چارو د زياتوالي ارزښت یې د وړم کال د همدې مودې په پرتله په سلو کې اته اعشاريه نهه زيات شوی، چې د ټولو مهمو صنايعو برخه يې د وړم کال د همدې مودې په پرتله په سلو کې صفر اعشاريه شپږ لوړه شوې ده.
په چين کې د توليدي چارو پانګونې هم چټک پرمختګ موندلی او د دغو چارو د ښه کېدو مثبت عوامل يې مخ په زياتېدو دي.
چين تېر کال ډېرې ستر ابتکارونه لرل او د صنايعو د ساينسي او علمي نوښت هڅو ته يې دوام ورکړی دی او په ورته وخت کې یې د عصري تجهيزاتو او مصنوعي ځيرکتيا په شمول ابتکاري توانونه نور هم پياوړي شوي او د بيولوژيکي توليد او روبوټونو په شمول نویو سمسورو چارو يې چټک پرمختګ موندلی او ځيني نوي تختيکي توليدات یې پر له پسې توليد کړي، چې په دې سره يې صنعتي جوړښت ډېر ښه شوی دی.
د توليدي چارو پر له پسې نوښت د ابتکاري سيسټم په بشپړېدو پسې تړاو لري.
د معلوماتو له مخې، چين تېر کال د نوې انرژۍ د زېرمې، د ميکرو – نانو توليد (Micro-Nano Fabrication)، د انسان په شکل د روبوټونو او ځيرکو روبوټونو په برخو کې د دولت په کچه د توليدي چارو پنځه ابتکاري مرکزونه جوړ کړي، ۶۷۲ کليدي تخنيکونه او ۶۹۰ تخنيکي لاسته راوړنې يې خپلې کړي او ۱۸۲ تصدۍ يې جوړې کړې دي.
د چين د صنايعو او معلوماتي ټکنالوژۍ وزارت د تخنيکونو او مهارتونو د ښه والي او د توليداتو د نوښت په پار د توليدي چارو د ازمايښتي ډګر ابادۍ ته پرمختګ ورکړی او تراوسه يې په ټول هېواد کې څه باندې ۲۴۰۰ ورته ډګرونه جوړ کړي او څه نا څه ۱۵۰ زرو مهمو تصديو پکې ازموينې ورکړې دي.
د زرغون توليد پرمختګ د نوي صنعت د پرمخبېولو يوه مهمه دنده بلل کېږي. جيانګ يون مينګ ويلي، په چين کې د دولت په کچه د زرغونو فابريکو شمېر ۶۴۳۰ ته پورته شوی او توليدي ارزښت يې د تولیدي چارو د عمومي تولیدي ارزښت په سلو کې شل برخه نيولې ده، چې دا د وړم کال په پرتله په سلو کې دوه زياتوالی ښيي. نوموړي ويلي، دغو فابريکو د ځمکو، اومو توکو، توليد او د کثافاتو او خځلو د بيا کارونې او د انرژيو د کاربون د خپرېدو اندازې د ټيټوالي په برخه کې زرغوني پرمختګ موندلی دی.
په نوي کال کې به د چين توليدي چارې د بهرني چاپېريال د بدلونونو له منفي اغېزو سره سره د عصريتوب، ځيرکتيا او زرغونتوب په لور روانې شي. د چين د صنايعو او معلوماتي ټکنالوژۍ وزارت به په راتلونکي ګام کې د عصري صنعتي سيسټم او د تولیدي چارو د زرغون پرمختګ لپاره خپلو هڅو ته دوام ورکړي.
