سره له دې چې په وروستیو کې د سولې پر ټپه ولاړ بهیر نیوکې ډېرې شوي، خو په هېواد کې د سیاسی لورو اندېښنې هم مخ پر زیاتېدو دي. نړیوالې رسنۍ او سیاسي شنونکي په دې اند دي چې د افغانستان د سولې بهیر کاواکه دی، ډاډمن نه دی او بیا کتنې ته اړتیا لري، خو په کور د ننه بیا سیاسیون په دې باور دي چې د بین الافغاني مذاکراتو په ټپه ولاړ بهیر ورته د منلو نه دی. تازه د ملي مصالحې عالي شورا رییس ډاکټر عبدالله عبدالله ویلي چې طالبان په بېلابېلو پلمو د سولې بهیر ځنډوي، خو طالبانو بیا په ځلونو افغان لوری د مذاکراتو د ځنډ لامل بللی دی.
د سیمې هېوادونو ته د طالب مشرانو تر سفر وروسته د افغان حکومت ځینو چارواکو غبرګون ښودلی او په خبره یې، د طالبانو دغه چلند د سولې په بهیر کې ځنډ او خنډ رامنځ ته کړی دی. د ملي مصالحې عالي شورا رییس ډاکتر عبدالله عبدالله وړمه ورځ ناوخته په یوه خپره کړې اعلامیه کې ویلي چې د افغان حکومت مذاکراتي پلاوی له پوره صلاحیت او ملاتړ سره په دوحه کې د بین الافغاني مذاکراتو لپاره تیار دی، خو طالبان په غیر معقولو دلایلو او پلمو په دغه بهیر کې خنډ او ځنډ رامنځ ته کوي. نوموړي ویلي وو چې طالبان په بین الافغاني مذاکراتو کې د ګډون پر ځای او په دغه بهیر کې د پرمختګ راوستلو پر ځای د سیمې هېوادونو ته په سفرونو لګیا دي او دې مسئلې د سولې بهیر له خنډ او ځنډ سره مخ کړی دی. هغه وایي: «د افغانستان د اسلامي جمهوریت پلاوی همدا اوس په دوحه کې دی. دوی پوره صلاحیت او هر اړخیز ملاتړ له ځان سره لري. ټاکل شوې وه چې د تګلارې تر نهایي کېدو وروسته دویم پړاو مذاکرات پیل شي، خو له بده مرغه طالبان د پلمو په جوړولو او د غیر معقولو دلایلو په راوړلو سره په مذاکراتو کې د ځنډ سبب دي».
ډاکتر عبدالله عبدالله همدا راز وایي، طالبانو ته په کار وه، چې په دې حساس وخت کې یې د سفرونو پر ځای او د پلمو د راوړلو پر ځای پر بین الافغاني مذاکراتو تمرکز کړی وی او د تاوتریخوالي پر کمولو هوکړې ته رسېدلي وای. هغه ویلي: «دوی د افغانستان پر قضایاوو د بحث پر ځای، د جګړې د ختمولو او مسلمان وژنې د پای ته رسولو پر ځای، لا د خلکو دردونه ډېر کړي دي. دوی په افغانستان کې د ناورین د ختمولو پر ځای پر سفرونو او حاشیوي مسایلو بوخت دي. دې ډلې همداسې تاوتریخوالي او جګړې ته ادامه ورکړې ده».
عبدالله د سولې مذاکرات د افغانستان لپاره یو بې ساري فرصت بللی او پر طالبانو یې غږ کړی، چې په دې توګه دې دغه مهم فرصت نه ضایع کوي. هغه تمه ښودلې چې طالبان ژر تر ژره بېرته د مذکراتو مېز ته راوګرځي او د روانې جګړې پر ختمولو توافق وکړي.
له دې سره جوخت د ولسمشر غني پخواني لومړي مرستیال هم د سولې د روان بهیر په اړه خپله اندېښنه ښودلې ده. هغه له محمد محقق سره د لیدنې پر مهال ویلي چې د سولې له خبرو سره هممهاله پر طالبانو د نظامي فشار اړتیا ده. د ده په خبره، که پر دغه ډله فشار را نه وستل شي، نو سولې ته نه تیارېږي. هغه همدا راز په کور د ننه د سیاسي څېرو پر یووالي هم ټینګار کړی دی. نوموړي ویلي، که افغان سیاسیون په خپلو کې د نظر یووالی ونه لري، اختلافات همداسې دوام وي، نو په خبره یې، میدان به طالبان وګټي.
هغه پر ټولو سیاسي جهتونو غږ کړی چې په خپلو کې واټن کم کړي؛ ځکه دمګړی د افغان حکومت سیاسي جغرافیه له خطر سره مخ ده او باید ټولو اړخونه د طالبانو پر وړاندې متحد شي.
