د ولسي جرګې رییس:مونږ ته هم د موقت حکومت طرحه رسېدلې او ملاتړ ترې کوو

د ولسي جرګې رییس میر رحمان رحماني وايي، چې د روانې جګړې له کبله هره ورځ لسګونو افغانانو ته مرګ ژوبله اوړي، خو حکومت او طالبانو بیا د واک او امتیاز ترلاسه کولو لپاره ‎د سولې بهیر له خنډونو سره مخ کړی دی. رحماني زیاتوي، چې روان وضعیت نور ورته د منلو نه دی او دواړې خواوې دې ژر تر ژره د سولې په خبرو کې په ټپه درېدلی حالت پای ته ورسوي.نوموړي دغه راز په دې تړاو یوه ۲۱ کسیز کمېسیون ته دنده سپارلې چې د سولې په ټپه درېدلی حالت له نږدې و ارزوي. د رحماني په خبره، یاد کمېسیون به د مصالحې له عالي شورا، د سولې وزارت، سیاسیونو او د سولې له دواړو مرکچي پلاوو سره په دې تړاو خبرې وکړي، ترڅو په خبرو کې روان بن‌بست پای ته ورسېږي.نوموړي دغه راز وویل چې دوی ته هم د سولې لپاره د موقت حکومت جوړولو طرحه رسېدلې او ملاتړ ترې کوي.