د پنجشیر له سقوط وروسته؛ طالبانو د پنجشیر خلکو ته د بشپړ امنیت ډاډ ورکړی دی

د طالبانو له لوري په خپره شوې رسمي اعلامیه کې راغلي چې دغه ولایت هم د دوی له لوري نیول شوی او په دې توګه ټول هېواد د دوی په بشپړ کنټرول کې دی. د طالبانو ویاند ذبیح الله مجاهد په خپره کړې اعلامیه کې ویلي چې د پنجشیر ټولو وګړو ته د امنیت ډاډ ورکوي او په خبره یې له دوی سره به هېڅ ډول توپيري چلند نه کېږي. مجاهد زیاته کړې چې په پنجشیر کې د امتیاز غوښتونکو او یاغیانو له لوري جګړه روانه وه چې د پنجشیر شریف ولس یې برمته کړی و او اوس یې دوی له شره خلاص شول. ذبیح الله مجاهد پر خلکو غږ کړی چې ژر تر ژره د امنیت په موخه همکاري ورسره وکړي، سوله ییز ژوند ته راوګرځي او په ګډه له نورو افغانانو سره اوږه په اوږه د هېواد د جوړولو لپاره سره لاس په کار شي.