د هېواد په بېلابېلو ولایتونو کې د پرله پسې جګړو، نښتو او چاودنو خبرونه دي. هره ورځ د لسګونو امنیتي ځواکونو او طالبانو د وژلو ادعاوې کېږي. حکومت طالبان ملامتوي چې بریدونه یې ډېر کړي دي، خو طالبان بیا امریکایان ملامتوي چې هوکړه یې نقض کړې او پر حکومت هم نیوکې کوي چې د سولې په لاره کې خنډونه جوړوي. که له ملامت او سلامت ور تېر شو، څه چې روښانه دي، هغه د افغانستان د خلکو د هیلو او غوښتنو خلاف د جګړې زیاتوالی دی، چې پکې د ښکېلو لورو ترڅنګ هره ورځ بې ګناه ملکي وګړي هم وژل کېږي.
د امریکا او طالبانو ترمنځ د سولې له هوکړې وروسته تر بل هر وخت اوس جګړه زیاته شوې ده. سره له دې چې د روژې په احترام او د کرونا د بحران له امله له ښکېلو اړخونو غوښتنه وه چې جګړه کمه کړي، خو له بده مرغه دا غوښتنه نه ده منل شوې او جګړه لا زیاته شوې ده. دواړه لوري پلمې کوي. طالبان وايي هوکړه نه عملي کېږي، خو حکومت او امریکا وايي، طالبانو تاوتریخوالی نه دی کم کړی. داسې ښکاري چې دا د جګړې د دوام لپاره یوازې پلمې دي. کله چې حکومت جنايي بندیان خوشې کوي، نو په دې کې څه ستونزه ده چې د طالب بندیانو خوشې کول چټک کړي!؟ کله چې طالبان له امریکا سره اوربند لري او د امریکا له پرله پسې سرغړونو سره سره دا اوربند نه ماتوي، نو په دې کې څه ستونزه ده چې له خپله اړخه له افغان لوري سره هم جګړه او تاوتریخوالی کم کړي!؟ مهمه دا ده چې دواړه لوري پر دې ولس زړه وخوږوي او پرېږدي چې په جګړه، غربت او کرونا کې را ګیر ولس لږ د ارام ساه واخلي. اوس د ضد وخت نه دی او دا ضد د افغانانو د وینې تویېدنې او وژنې د دوام سبب ګرځي. دا هغه وخت دی چې هر لوری له خپله اړخه باید حسن نیت وښيي. طالبان دې د یو څه وخت لپاره د حکومت کړنې هېرې کړي، له خپله اړخه دې تاوتریخوالی کم کړي او ولس او نړۍ ته دې وښيي چې دوی د سولې غوښتونکي دي. حکومت دې هم د طالبانو بریدونه هېر کړي، د بندیانو د خوشې کولو پروسه دې چټکه کړي او له خپله اړخه دې د سولې ضد څرګندونه او دریځونه پرېږدي. که یو لوری هم یو اړخیز مثبت ګامونه واخلي، بل لوری به مجبور شي، چې مثبت ګامونه واخلي. اوس د جګړې له ښکېلو اړخونو یو مثبت او د سولې حرکت هم مهم دی او مخامخ د باور په زیاتولو او د جګړې په کمولو کې رول لري. له همدې امله پکار ده چې دواړه اړخونه له خپله اړخه د مثبتو ګامونو په اخیستو او د حسن نیت په ښکاره کولو کې سیالي وکړي.
د ښکېلو اړخونو اوسني دریځونه د جګړې دوام سبب شوي دي. پر دغه دریځونو ټینګار به جګړه وغځوي او د سولې په برخه کې به خنډونه هم زیات کړي. د دې وېره هم شته چې د دغه حالت دوام به یو مخ د سولې د هوکړې د له منځه تللو او د جګړې پخواني حالت ته د ور ګرځېدو سبب شي. له همدې امله پکار ده چې د سولې له اوسني فرصت څخه ګټه واخیستل شي او د جګړې مخه ونیول شي.
