په کابل او ولایتونو کې د نا امنیو له اوج سره هممهاله، د افغان حکومت لوړپوړي چارواکي د طالبانو او نورو ترهګرو ډلو په اړه تازه څرګندونې کوي. د ولسمشر لومړي مرستیال امرالله صالح د شپږنیمو بجو جلسې په تړاو په یوه خپاره کړي پيغام کې غوښتنه کړې، چې له دې وروسته دې طالب بندیان اعدام کړل شي. بلخوا طالبانو د صالح پر دې څرګندونو غبرګون ښودلی دی. د افغانستان د بشري حقونو خپلواک کمېسیون هم وایي، چې په هېواد کې هر څوک په خپل زړه د چا په اړه پرېکړه نه شي کولی، بلکې دا د عدلي او قضايي ارګانونو صلاحیت دی.
تر هغه وروسته چې د طالبانو او افغان حکومت ترمنځ په دوحه کې بین الافغاني مذاکرات پیل شول، ورسره جوخت په کابل او ځینو نورو مهمو ښارونو کې هدفي بریدونه او چاودنې هم ډېرې شوې دي. تر څنګ یې طالبانو په ګڼو ولسوالیو کې بریدونه کړي او وخت ناوخته خونړۍ جګړې کوي. تېره ورځ په هلمند او غزني کې هدفي بریدونه شوي، په کابل کې د ماین درې چاودنې شوې او وړمه شپه په کابل کې دوه کسه چې یو یې ملکي او بل یې دولتي و، د ناپېژانده کسانو په برید کې وژل شوي دي. وړمه ورځ بیا په کابل ښار کې ناپېژانده وسله والو د ښځینه قاضیانو پر موټر برید وکړ او دوې ښځينه قاضیانې یې ووژلې.
د دې ټولو پېښو په غبرګون تېره ورځ امرالله صالح ویلي، چې دغه ډول بریدونه وسله وال طالبان ترسره کوي، نو د دې وخت دی چې د دغې ډلې بندیان باید اعدام کړل شي. د ده په خبره، د طالبانو په ګډون د ټولو هغو ترهګرو ډلو بندیان باید اعدام شي، چې د عامو خلکو په وژنو او هدفي بریدونو کې لاس لري. د ده په خبره: ((د طالبانو بندیان فکر کوي چې دوی بښل کېږي، دوی د خپلو اعمالو جزا نه ویني. د دې ستونزې د حل اساسي لار دا ده چې ځینې نیول شوي ترهګر باید اعدام شي. دوی باید اعدام شي چې د پاتې نورو لپاره د عبرت درس شي)).
د ولسمشر لومړی مرستیال د امنیتي پېښو د ډېرېدو لامل همدا بولي چې طالبان د معافیت په فکر کې دي او وسله وال یې په پوره زړورتیا په ښارونو کې ورته ترهګریز فعالیتونه ترسره کوي. هغه وړمه ورځ د جنایي جرمونو د ډېرېدو لامل هم دا بللی و چې د کرونا له وېرې حکومت ځینې جنایي بندیان خوشي کړل او دوی اوس په لارو او کوڅو کې په جنایي جرمونو بوخت دي.
د ولسمشر د لومړي مرستیال دې څرګندونو غبرګونونه هم لرلي دي. د طالبانو ویاند ذبیح الله مجاهد له رسنیو سره په خبرو کې ویلي چې که افغان حکومت په ورته یوه کار لاس پورې کړي نو دوی هم بدیلې لارې لري. د ده په خبره: ((په داشان کړنو سره به د سولې خبرې له ستونزو سره مخ شي او دوی غواړي خپله ناکامي په دې کارونو سره پټه کړي)).
د افغانستان د بشري حقونو کمېسیون هم وایي چې هر څوک په خپل سر د چا په اړه پرېکړ نه شي کولی. د دغه کمېسیون په خبره، افغانستان قوانین لري، ادارات لري او دوی به د مسایلو په اړه قوانینو ته په کتو پرېکړه کوي. د افغانستان د بشري حقونو خپلواک کمېسیون د نشراتو د برخې مسوول ذبیح الله فرهنګ ویلي، د حکومت اجرایه بنسټونه د لومړي معاونیت په ګډون دغه ډول فرمانونه نه شي صادرولی. د ده په خبره: ((د قانون د پلي کېدو مسوولیت او مکلفیت د عدلي او قضایي بنسټونو کار دی، د حکومت اجرايه بنسټونه د لومړي معاونیت په ګډون د داشان حکمونو، لکه اعدام مسوولیت نه لري)).
په هېواد کې امنیتي پېښې داسې مهال ډېرېږي، چې په دوحه کې بین الافغاني خبرې روانې دي او د عامو افغانانو په باور د طالب مشرانو او افغان حکومت د چارواکو خبرې په اوسنیو شرایطو کې د سولې له روحیې سره په ټکر کې دي او دواړو لورو ته په کار ده چې د باور په فضا کې د روانې جګړې پر پای هوکړې ته سره ورسېږي.
