پرون په کابل کې د وړمې ورځې د پېښې له امله د غم ټغر خپور و او په ټول هېواد کې ملي ماتم اعلان شوی و. سره له دې چې د دې خونړۍ جګړې اصلي قربانيان عام افغانان دي، خو بیا هم د جګړې ښکېل لوري یو بل د جګړو پر تودولو او د خونړیو بریدونو پر ترسره کولو تورنوي. پرون ګڼو افغان چارواکو په بېلو پیغامونو کې وسله وال طالبان د دغه برید مسوول وبلل او د دې ټولو پر وړاندې بیا زلمي خلیلزاد وویل چې برید طالبانو نه دی کړی، بلکې د طالب او حکومت د ګډ دښمن کار دی. د قربانیانو کورنۍ بیا حکومت د لومړي درجه مسوول په توګه په پېښه کې پړ بولي.
وړمه ورځ په کابل ښار کې د افغانستان پر ستر تحصیلي مرکز (کابل پوهنتون) خونړی برید وشو. وسله وال دغه پوهنتون ته ننوتل او پر محصلینو یې ډزې وکړې. تر شلو پورې محصلین او د پوهنتون استادان یې ووژل او له افغان ځواکونو سره یې اوږده نښته وکړه. دا برید په کابل کې پر امریکایي پوهنتون تر برید وروسته دویم و چې پر لویو تحصیلي مرکزونو ترسره کېږي.
له دې پېښې وروسته ګڼو افغان چارواکو، نړیوالو بنسټونو، ګاونډیو او نورو هېوادونو غبرګونونه وښودل او دا یې ستر بشري جنایت وباله. سره له دې چې طالبان په دې برید کې لاس لرل ردوي، خو افغان حکومت ټینګار کوي چې دا برید وسله والو طالبانو کړی دی. د ولسمشر لومړي مرستیال پرون سهار په خپاره کړي پیغام کې وویل، دوی داسې سندونه او ثبتونه لري چې ګواکې پر کابل پوهنتون د وړمې ورځې برید طالبانو او حقاني شبکې کړی دی. د ده په خبره، له بریدګرو سره داسې توکي موندل شوي چې ښيي دغه کسان د حقاني شبکې غړي دي او د طالبانو تر چتر لاندې فعالیت کوي. هغه وایي: ((موږ اسناد لرو، موږ به لا ډېرې څېړنې وکړو، خو دا بریدونه په خپل ډول کې د حقاني شبکې بریدونو ته ورته دي. په کابل کې د داعش په نامه د عملیاتو پلان کوونکي د حقاني شبکې غړي دي. که طالبان هر څه ووایي، خو د دې برید مسوولین دوی دي. ځان له دې مسوولیت نه شي خلاصولی)).
د افغانستان د ملي امنیت شورا سلاکار حمدالله محب هم وایي چې د دغه برید مسوولین وسله وال طالبان دي او په خبره یې، افغان پوځ به غچ ترې واخلي. هغه زیاته کړې چې له ترلاسه شوو اسنادو ښکاري، دا برید طالبانو کړی او دغه ډله یې مسووله ده. د ده په خبره: ((طالبان په یوه پیغام ځان نه شي خلاصولی، دا یې لار نه ده چې یو پیغام خپور کړي او ووايي چې برید دوی نه دی کړی. اصلي مسوولین یې دوی دي)).
د افغان حکومت د مذاکراتي پلاوي مشر معصوم ستانکزي هم په ټویټ پیغامونو کې طالبان په دې برید کې ملامت بللي او په خبره یې، که دغه ډله په رښتینې توګه د عامو افغانانو د وینې درولو ته ژمنه ده او غواړي چې د دښمن لاس د افغان انسان له مرۍ لنډ شي، نو اوربند دې وکړي. د ده په وینا، طالبان پر کابل پوهنتون د برید له مسوولیت ځان نه شي خلاصولی او نه هم ځان ترې پاکولی شي، خو که رښتیا غواړي جګړه ودرېږي او د افغانانو ګډ دښمن کمزوری شي، نو باید اوربند وکړي. د ده په خبره: ((طالبان په هېڅ صورت د دې برید له مسوولیت ځان نه شي خلاصولی. باید اوربند وکړي او د دښمن لاس لنډ کړي. دا برید د بریدګرو پر تندي تور داغ دی چې په هېڅ صورت نه بښل کېږي)).
له دې ټولو ورهاخوا امریکا د طالبانو دفاع ته رادانګلي دي. زلمي خلیلزاد په خپلو ټوېټ پیغامونو کې په واضح توګه ویلي چې دا کار د طالبانو نه دی، خو طالبانو او حکومت ته په کار ده چې ژر تر ژره د سولې یو توافق رامنځ ته کړي او د ګډ دښمن پر وړاندې جګړه وکړي. هغه ویلي: ((دې برید وښوده چې دلته نورې ترهګرې ډلې هم فعالیت کوي، طالبان او حکومت دې جګړه ودروي، باید د ګډ دښمن پر وړاندې ګډه مبارزه وکړي. ژر تر ژره دې یو توافق رامنځ ته کړي)).
له دې ټولو سره سره، د قربانیانو کورنۍ چې د غم پر ټغر ناستې دي، حکومت د خلکو د امنیت لومړۍ درجه مسوول بولي. دوی له حکومت غواړي چې ژر تر ژره دې د پېښې طراحان او اصلي عاملین ونیسي، حقایق دې له خلکو سره شریک کړي او د روانې جګړې د پای لپاره دې عملي ګامونه اوچت کړي.
