طالبان: ټول حکومتي بندیان مو خوشې کړل

طالبانو ویلي چې نن یې په زابل کې ۲۰، په فراه کې ۱۷، نیمروز کې ۷، هرات کې شل او په غور ولایت کې ۱۲ تنه حکومتي‌ زندانیان خوشي‌ کړي‌ دي.‌ د یادې ډلې ویاند ذبیح الله مجاهد ویلي چې دوی نن د ټولو حکومتي زندانیانو په خوشې کولو سره د زندانیانو د خلاصون پروسه بشپړه کړې ده. مجاهد زیاته کړې، د دوی له لوري د بندیانو د خلاصون پروسه د تېرې وري (حمل) میاشتې په ۲۴مه پیل او نن بشپړه شوې ده. طالبانو ژمنه کړې وه چې د ښه نیت ښودلو په موخه به تر اختر مخکې د افغان حکومت ټول بندیان خوشي کړي او له حکومت څخه یې غوښتي وو چې د دوحې هوکړې پر بنسټ دې د دوی ۵ زره بندیان خوشې کړي څو بین الافغاني مذاکراتو ته لار هواره شي.