عبدالله: طالبان په خپلو ژمنو کې پاتې راغلي دي

د ملي مصالې عالي شورا رییس عبدالله عبدالله ویلي چې طالبانو تر اوسه پورې په خپلو ژمنو عمل نه دی کړی. نوموړي نن په کابل کې یوې خبري ناستې ته په خبرو کې زیاته کړې، طالب وسله والو د بهرنیو او کورنیو غوښتنو سره سره د تاوتریخوالي کچه نه ده کمه کړې او د ده په خبره، دا چاره د سولې خبرو د روان بهیر د ورو پرمختګ لامل شوې ده. عبدالله څرګنده کړې، چې د تاوتریخوالي لوړه کچه هیچاته هم د منلو نه ده او نور باید هر څه ژر د سولې خبرو بریا لپاره د جګړې دواړه لوري اړین اقدامات وکړي. نوموړی دا څرګندونې په داسې حال کې کوي چې طالبان بیا د سولې خبرو ورو پرمختګ پړه پر افغان دولت اچوي او وایي چې دوی د دوحې هوکړه کې پر کړو ژمنو عمل کړی دی او له مقابل لوري هم د ژمنتیا تمه لري.