له هراته بهر ته د کورنیو تولیداتو صادرات زیات شوي

د هرات د سوداګرۍ او پانګونې خونې د معلوماتو له مخې، د روان کال په لومړیو پنځو میاشتو کې له دغه ولایت څخه د څه باندې ۱۱۰ زره ټنه کورنیو تولیداتو صادرات شوي دي. د یادې خونې د شمېرو له مخې، د دغو صادراتو ټولیز ارزښت ۹۰ میلیونه او ۸۸۰ زره امریکايي ډالرو ته رسېږي چې د تېر کال د همدې مودې په پرتله ۶۸ سلنه زیاتوالی ښيي. په صادر شویو توکو کې وچه او تازه مېوه، درملیز بوټي، زعفران، سابه، د صنعتي ښارګوټي تولیدات، لاسي او دودیزې غالۍ، د څارویو محصولات او یو شمېر نور توکي شامل دي.