مجاهد: د ا.ا لومړیتوب د هېواد ابادي ده هېوادوال دې هیلې نه بایلي

د افغانستان ا.ا عمومي ویاند ذبیح الله مجاهد وایي چې د خپلواکي تر اخیستلو وروسته د دوی لومړیتوب د هېواد ابادي ده او دوی تمه لري چې هېوادوال خپلې هیلې ونه بایلي. نوموړي زیاته کړې ده چې ا.ا د ټولو هغو اقداماتو ملاتړ کوي چې د هېواد د پرمختګ، ښېرازې او د هېوادوالو د هوساینې سبب ګرځي. هغه د خپلو خبرو پر دوام د هوا ککړتیا ته په اشارې څرګنده کړې چې اړوندې ادارې باید نور ګامونه هم واخلي، د تجارت وزارت، د صنعت وزارت او معادنو وزارت باید په خپلو قراردادونو کې د محیط زیست موضوع هم شامله کړي، چې دا به لوی پرمختګ او سهولت رامنځته کړي. مجاهد دغه راز ویلي چې ټول ښاریان باید له پیلټرونو څخه استفاده وکړي تر څو په دې سره تر یوه حده د هوا د ککړتیا مخنیوی وشي.