پرون ولسمشر غني امنیتي ادارو ته امر کړی چې د دیني عالمانو او جوماتونو امنیت ته پام وکړي. ولسمشرۍ ماڼۍ وايي د کابینې په غونډه کې ولسمشر غني ویلي چې د دیني عالمانو امنیت باید نور لومړیتوب وي. له همدې سره هممهاله دیني عالمان او د شېرشاه سوري جومات لمونځ کوونکي او د دغه جومات د شهید شوي امام کورنۍ وايي چې په جومات کې شوې چاودنه ډېره مشکوکه او ګونګه ده او حکومت یې په لازم ډول نه څېړي.
پر دیني عالمانو د وروستیو بریدونو په اړه ډېر شکونه او پوښتنې شته چې لا هم بې ځوابه دي او دا د حکومت مسوولیت دی چې دغو پوښتنو ته ځواب ووايي. دا بریدونه څوک کوي، ولې یې کوي او څنګه بریالي کېږي چې دا ډول بریدونه وکړي…؟ حکومت مخامخ مسوول دی، ځکه چې د خلکو د ژوند د خوندي کولو مسولیت لري. له همدې امله له یوه اړخه باید حکومت د دغو بریدونو مخه ونیسي او له بله اړخه ولس ته واضېح ځواب ووايي چې دا ډول بریدونه څوک او ولې کوي. حکومت ۳۵۰ زره امنیتي ځواکونه لري، د دوی دنده ده چې د دغو بریدونو پلانوونکي ومومي او خلک خوندي کړي. اوس له بده مرغه نه یوازې خلک خوندي نه دي، بلکې خلک پوهېږي هم نه چې څوک او ولې پر جوماتو، دیني عالمانو او لمونځ کوونکو بریدونه کوي.
تر دې مهمه، خطرناکه او لویه جدي مسأله دا ده چې خلک خپله د حکومت په اړه بدګومانه کېږي. په شېرشاه سوري جومات کې له چاودنې وروسته لمونځ کوونکي او د سیمې اوسېدونکي په تکرار وايي چې له چاودنې یوه ورځ وړاندې امنیتي ځواکونو یا د امنیتي ځواکونو په نوم وسله والو جومات خالي کړی، خلک یې ترې ایستلي او کتلی یې دی. آن ځیني خلک وايي چې ښايي همدغو کسانو چاودېدونکي مواد ځای پر ځای کړي وي. حکومت ته پکار ده چې دغو تورونو ته ځواب ووايي. ایا رښتیا هم امنیتي ځواکونو جومات تلاشي کړی او که بل څوک دي؟ که بل څوک وي، نو څوک دي چې د امنیتي ځواکونو په جامو کې راځي، له جوماته خلک وباسي او تلاشي کوي؟ که امنیتي ځواکونه وي، ولې امنیتي ځواکونه جومات ته تللي، دوی هلته څه کول؟ که امنیتي ځواکونو ته د برید یا چاودنې معلومات وو او جومات یې کتلی، نو بیا ولې چاودنه وشوه؟ او که دا ادعا یو مخ ناسمه هم وي او هېڅوک جومات ته نه وي ورغلي، بیا هم حکومت باید واضح ووايي چې نه د دوی امنیتي ځواکونه او نه هم د امنیتي ځواکونو په نوم بل څوک له چاودنې وړاندې جومات ته تللي دي.
دا او دې ته ورته جدي، مهم او لوی شکونه او پوښتنې شته چې حکومت یې باید ځواب کړي. که تر اوسه پورې پر حکومت دا تور و، چې د خلکو د سر ساتنه نه شي کولی، نو له دې وروسته حالت تر دې هم خطرناک کېږي. که له ولس سره دا فکر پیدا شي چې حکومت یا حکومتي کړۍ په دغو بریدونو کې ښکېلې دي، نو بیا به دا د حکومت لپاره ډېرې ناوړه پایلې ولري. له همدې امله حکومت باید وضاحت ورکړي، خپل دریځ روښانه کړي او په دې اړه را پورته شوي شکونه او اندېښې ځواب کړي.
