پکتیا کې د غره ښویېدنې له امله د یوې کورنۍ ۵ غړي مړه شوي

د پکتیا د پېښو پر وړاندې د مبارزې او چمتووالي ریاست مسوولینو د دغه ولایت د وزې ځدراڼ ولسوالۍ کې د غره ښوېیدنې خبر ورکړی دی.  د یاد ولایت د پېښو پر وړاندې د مبارزې او چمتووالي رییس نثار احمد نجات ویلي، چې د ياد ولايت په وزې ځدراڼ ولسوالۍ کې د غر ښوېيدنې له امله د ماشومانو په ګډون د يوې کورنۍ پنځو غړو ژوند له لاسه ورکړی دی.  هغه زیاته کړه چې د وروستیو سختو ورښتونو او سېلابونو له امله د ۶۴ کورنو په ګډون سلګونه جریبه ځمکې، یو شمېر پلونه او سړکونه ویجاړ شوي دي، چې اړوند سیمو ته یې د سروې په موخه ټیمونه لیږل شوي څو د اړمنو لاسنیوی وکړي.