چين او امريکا د ډسمبر له نيمايي راهيسې پر څو اړخيزو خبرو اترو بوخت دي، چې د بېلګې په توګه يې د اقتصادي چارو کاري ډلې ۷مه غونډه او د پولي چارو کاري ډلې ۷مه غونډه یادولی شو. دواړو هېوادونو د ساینس او ټېکنالوژۍ همکاریز تړون د نورو ۵ کلونو لپاره تمدید کړی دی.
چين وايي، بېجينګ او واشنګټن، چې څومره همکارۍ وکړي، هغومره به یې چارې پراخې او ګډې ګټې به ومومي.
شنونکي د چين او امريکې اوسنۍ خبرې د امریکا د حکومت د انتقالي دورې په بهیر کې یو مثبت ګام بولي او باور ښيي، چې د دواړو هېوادونو ډیالوګ او همکارۍ به ثابت پرمختګ ومومي.
د چين او امريکې پر سیاسي اړيکو ۴۵ کالونه اوښتي او تجربو یې ثابته کړې، چې دواړه هېوادونه له ګډو همکاريو ګټې پورته کولی او مقابلې یې دواړو ته زيانونه رسولی شي.
د چين دولت رئيس شي جين پينګ په تېر نومبر کې د امريکا له ولسمشر جو بايډن سره ولیدل او د دغه هېواد نوي منتخب ولسمشر ډونالډ ټرمپ ته يې د مبارکۍ پيغام ولېږه او په يوه مهم پړاو کې يې د چين او امريکې د اړيکو د پرمختګ لارښوونه کړې ده.
رئيس شي جين پينګ په تېرو ۴ کلونو کې د چين او امريکې د اړيکو د پرمختګ د تجربو ٧ ټکي لنډيز کړي، چې يو يې پکې د دواړو هېوادونو ترمنځ خبرې او همکارۍ یادې کړې دي.
رئيس شي جين پينګ په همدغه ټکي کې د چين او امريکې د ګډو ګټو په اړه ژور پوهاوی منعکس کړی او دغه هيله یې هم پکې رانغښتلې، چې چين او امريکا دې د ۲ لویو هېوادونو په توګه خپل مسؤليتونه پرغاړه واخلي.
چين او امريکا د نړۍ دوه مخکښ لوی اقتصادونه دي او په اوسنيو شرايطو کې ډېرې ګډې ګټې لري.
بېجينګ او واشنګټن په دې وروستيو کلونو کې د دواړو هېوادونو د مشرانو په مشرۍ څه دپاسه ۲۰ تبادلوي میکانیزمونه جوړ کړي او په ډيپلوماسۍ، امنيت، اقتصاد او سوداګرۍ، د نشه يي توکو د مخنيوي، کرنې، کولتور او ځينو نورو برخو کې يې پرمختګونه موندلي دي.
دواړو هېوادونو په تېر یوه کال کې د ستراتیژیکو اړیکو ۲ دورې خبرې اترې او د پولي او اقتصادي کاري ډلو ۵ غونډې ترسره کړي او په ګډه يې د ملګرو ملتونو په عمومي اسمبلۍ کې د مصنوعي ځيرکتیا پرېکړه لیکونه لاسلیک کړي، چې ډېرو هېوادونو او بېلا بېلو ټولنو یې تود هرکلی کړی دی.
دا د دې ښکارندويي کوي، که چين او امريکا په لېوالتيا ډيالوګ او همکارۍ وکړي، ګډې ګټې په پام کې ونیسي او یو د بل اندېښنو ته ځواب ووايي او حل یې کړي، نو سياسي متقابل باور به یې نور هم پياوړی شي.
اوسمهال نړيوال وضعیت کړکېچن او انسانان له بې سارو ننګونو سره مخ دي او د نړۍ لپاره د چين او امريکې همکارۍ ستر اهميت لري.
نړيوال تمه لري، چې چین او امریکا دې د اقليمي بدلون، د اوکراين د بحران او د کوريا ټاپووزمې په څېر د ځينو مهمو مسئلو په اړه خبرې وکړي او د نړيوالې سولې او پرمختګ د ساتلو په برخه کې دې خپل مسؤليتونه ادا کړي.
د پاکستان د ولسمشر پخواني مطبوعاتي سکرتر کمال البشیر په یوې مقالې کې د چین او امریکا همکارۍ نه یوازې د دواړو هېوادونو د علمي او تخنیکي او اقتصادي او ټولنیز پرمختګ لپاره ګټورې، بلکې د ګردې نړۍ د خلکو د هوساینې لپاره هم ګټورې او اړينې بللې دي.
د بېجينګ او واشنګټن تاریخي اړيکو ته په کتو، نړۍ دې ټکې ته رسیدلې، چې د چين او امريکې د اړيکو ثابت پرمختګ نه يوازې د دواړو هېوادونو، بلکې د نړۍ د انسانانو له راتلونکي او برخليک سره هم تړاو لري.
نړۍ تمه لري، چې چين او امريکا دې د خبرو اترو او اړيکو ساتلو ته دوام ورکړي، خپلمنځي همکارۍ دې پياوړې کړي، د لويو هېوادونو مسؤليتونه دې پرغاړه واخلي، د زياتو مهمو او ښو کارونو د ترسره کولو لپاره دې ګډ کارونه وکړي او د یوې ناڅرګندې نړۍ لپاره دې ډاډمنه فضا برابره کړي.
