ښځینه سوداګرې هېواد کې د مناسب بازار له نشتوالي شکایت کوي

یو شمېر سوداګرې ښځې د خپلو تولیداتو لپاره د مناسب بازار له نشتوالي شکایت کوي او زیاتوي، په وروستیو میاشتو کې یې د پلور بازار پیکه شوی دی. دوی له سرپرست حکومت غواړي چې په ‌دې برخه کې ښځو ته نورې اسانتیاوې هم برابرې کړي. له دې سره سم، د ښځو د سوداګرۍ او صنایعو خونه وايي، د متشبثو ښځو لپاره یې کورني بازارونه او همداراز روزنیز پروګرامونه جوړ کړي دي. د ښځو د سوداګرۍ او صنایعو خونې د مالوماتو له مخې، له یوه کال راهیسې ۵۶۰ ښځينه سوداګرې د دې خونې په سوداګریزو او تولیدي برخو کې ثبت شوې دي.