استرالیايي بنسټ: د ارزګان د قربانیانو کورنیو ته دې غرامت ورکړل شي

د اسټرالیا د نړیوال عدالت مرکز په نوم یوه استرالیايي بنسټ په خپل راپور کې د دغه هېواد له حکومته غوښتي چې په ارزګان ولايت کې د اسټراليايي ځواکونو په جنګي جنایتونو کې زیانمن شویو قربانیانو او کورنیو ته يې غرامت ورکړي. د دې بنسټ سرپرست اجرایوي رییس ته وايي، چې د اسټرالیا حکومت باید له دغو کورنیو سره د خسارې د جبران په اړه مشوره وکړي او د هغې پر بنسټ دې د زیانونو د جبران لپاره یوه حل لاره پیدا کړي. د اسټرالیا د نړۍوال عدالت مرکز په راپور کې راغلي چې، ۳۹ افغان ملکي وګړي د دې هېواد د ځواکونو له لوري په وحشیانه او غیرقانوني توګه وژل شوي دي. د استرالیايي رسنیو د راپور له مخې، د دغه هېواد د دفاع وزیر ويلي، غواړي له خپلو هغو پوځي قومادانانو مډالونه بېرته واخلي چې د افغانستان په ماموریت کې یې جنایتونه کړي دي. په همدې حال کې د ا.ا چارواکي وايي، چې د اسټراليا ترڅنګ ګڼ نور بهرني ځواکونه هم په افغانستان کې په جنګي جرمونو تورن دي او باید محاکمه شي.