افغان حکومت: د یوناما په راپور کې د ملکي تلفاتو ارقام ټکان ورکوونکي دي

حکومت د ملکي تلفاتو په اړه د یوناما درې میاشتنی راپور تایید کړی، خو طالبانو رد کړی دی. په افغانستان کې د ملګرو ملتونو دفتر (یوناما) نن د روان زېږدیز کال د لومړیو درېیو میاشتو د ملکي تلفاتو راپور خپور کړ. په دغه راپور کې راغلي چې په تېرو درېيو میاشتو کې ۵۳۳ ملکي وګړي وژل شوي او ۷۶۰ نور ټپیان شوي دي. یوناما ویلي چې تر ډېره د یادو ملکي تلفاتو مسوولیت په وسله والو طالبانو پورې اړوندېږي. د ملي امنیت شورا له خوا په یوه خپره شوې خبرپاڼه کې راغلي ، په دغه راپور کې د جګړې له امله ملکیانو ته د اوښتي مرګ ژوبلې په اړه یاد شوي ارقام ټکان ورکوونکي دي. په خبرپاڼه کې راغلي، دغه راپور دغه واقعیت نور هم روښانه کوي چې په هېواد کې د ملکي خلکو د ژوند خوندیتوب لپاره یوه سراسري او دوامداره اوربند ته سمدستي او جدي اړتیا ده. خو وسله والو طالبانو د یوې خبرپاڼې په خپرولو سره د یوناما یاد راپور رد کړی دی او یو اړخیز یې بللی دی.