اقلیمي بدلون افغانستان کې پاکو اوبو ته لاسرسی ستونزمن کړی

د سره صلیب نړیواله کمېټه وایي، د اقلیم د بدلون له امله په افغانستان پاکو اوبو ته د خلکو لاسرسی ستونزمن شوی دی. د دې کمېټې د افغانستان څانګې نن پر خپله ټویټر پاڼه لیکلي، چې په افغانستان کې پر بشري ناوړه وضعیت سربیره د اقلیم د بدلون اغېزې د دې هیواد په ډېرو سیمو کې څرګندې شوې، ځکه په ځپل شویو سیمو کې کورنۍ د څښاک پاکو اوبو ته په لاسرسي کې له ستونزو سره مخ دي. تردې مخکې د مهاجرت نړیوال سازمان، ویلي وو، چې ۷۹ سلنه افغانان کافي د څښلو اوبو ته لاسرسی نه لري. د ملګرو ملتونو د بشري چارو د همغږۍ دفتر اوچا د تېرې زمري میاشتې په پیل کې ویلي وو، چې د افغانستان له ۳۴ ولایتونو څخه ۲۵ یې د وچکالۍ له سختو شرایطو سره مخ دي او دا هېواد د اقلیم د بدلون له پلوه د نړۍ له لسو تر ټولو زیانمنونکو هېوادونو څخه دی.