اوس د چین دوه مجلسونه په پلازمېنه بېجینګ کې روان دي. د چین صدراعظم لي چیانګ د ۱۴م ملي ولسي کانګرس دوهمې کلنۍ غونډې ته د حکومت کاري راپور وړاندې کړ او پکې راغلي، چین به د عصري صنعتي سیسټم جوړولو ته هراړخيزه وده ورکړي، د نوي کيفيت تولیدي ځواکونو پراختیا به ګړندۍ او د نوښت لارښوونکي رول ته به بشپړ ارزښت ورکړي او د ساینسي او تخنیکي نوښتونو پر بنسټ به صنعتي نوښت په خوځښت راولي.
د پښتو څانګې خبریالې هیلې په دې اړه د افغانستان د سرپرست حکومت د ارګ د مطبوعاتي ادارې له مسئول انديښمن ځاځي سره یوه مرکه وکړه او ښاغلي اندېښمن ځاځي وویل، چې د نوي کیفیته تولیدي ځواک په اړه د چین نظریې د پاملرنې وړ دي. څرنګه چې سږ کال په چین کې د اصلاحاتو او ورخلاصون تګلارو د پلې کېدو له ۴۵مې کالیزې سره سمون لري، د دغو تګلارو له تطبیق راهیسې، چین د اقتصاد او ټولنې د پرمختګ په برخو کې د پام وړ بریالیتوبونه تر لاسه کړي دي. چین په دې بهیر کې پر پرانیستې ټينګار کړی او له بېلا بېلو هېوادونو سره ګټور فرصتونه شریکوي.
اندېښمن ځاځي صاحب په تېرو څلويښتو کلونو کې د چین د پرمختګ په جریان کې د پام وړ پرمختګ په اړه وویل، چین په تېرو څلویښتو کلونو کې پراخ او د پام وړ پرمختګونه کړي دي، خو تېر لس کاله بیا د چین له پاره په اقتصادي پرمختګ کې خورا مهم او طلایي کالونه وو.
نوموړي وویل، په تېرو ۴۵ کلونو کې او په ځانګړي ډول په تېرو لسو کلونو کې د چين حکومت د سوداګرۍ او پانګونې په موخه سوداګرو او پانګوالو ته ګڼې اسانتیاوې برابرې کړې دي. چین په کور دننه کې د بهرنيو تصديو حقه حقونه او پرمختيایي حقونه تضمين کړي، د بهرنیو هېوادونو د تولیداتو او وارداتو بهیر یې چټک او زیات کړی. چیني اقتصادي مارکیټونو ته یې د ننوتو بهیر خورا اسان او ساده کړی، او دې ته ورته نور ډېر د پام وړ کارونه یې ترسره کړي دي.
اندېښمن ځاځي په اشارې وویل، د کمربند او لارې د ګډې ابادۍ د بهیرونو له لارې ګڼ هېوادونه یې له ځان سره په دې اقتصادي او پراختیایي یون کې یو ځای کړي دي، د یادولو وړ ده چې چین په دې توانېدلی دی چې تر دې دمه شاخوا ۱۵۰ هېوادونه او له ۳۰ زيات نړيوال سازمانونه له ځان سره په دې سفر کې ملګري کړي چې دا په خپله یوه لویه لاسته رواړنه او پرمختګ بللی شو. چین همدا راز په تېرو څلویښتو کلونو کې په دې توانېدلی چې د سیمې له ګڼو هېوادونو سره د کرنې، انرژۍ، کلتور، روغتيا، پولي چارو، ساينس او تخنيک په ګډون په نورو ګڼو برخو کې د دوه اړخيزې همکارۍ پروژې په بریالیتوب سره پلې کړي.
نوموړي وویل، چې چین اوس د نوي کیفیته تولیدي ځواک په اړه نظریه وړاندې کړه او دا له نوښت څخه ډکه نظریه هم ده. چین تل له خپلو ځانګړتیاوو سره سم د پرمختګ لاره غوره کړې او ګټورې نظریې یې وړاندې کړې دي. د چین لخوا د نویو لاسته راوړنو تر لاسه کېدو ته سترګې په لار یوو.
هغه د چین او افغانستان ترمنځ د همکارۍ په اړه زیاته کړه، که افغانستان او چین د دوه اړخیزو اقتصادي ګټو پر بنسټ دا جوړې شوې اړیکې لا پسې پیاوړې کړي نو لرې نه ده چې دا اړیکې به د افغانستان تر څنګ خپله چین ته هم د اقتصادي ودې په بهیر کې ډېره مرسته وکړي او د چین اقتصادي پرمختګونه به لا پسې ګړندي کړي.
خو افغانستان ته هم پکار ده چې د خپل اقتصادي ملاتړي او ملګري هېواد له تجربو ګټه پورته کړي او د هغو مناسبو لارو چارو او تګلارو په کارولو سره خپلې اقتصادي ستونزې هوارې او اقتصاد ته وده ورکړي چې اوس ورسره دا هېواد لاس او ګرېوان دی او د چین د طرحو او تګلارو په مرسته دې خپل اقتصاد ته وده ورکړي.
