ایران ته د وسلو او نظامي تجهیزاتو د قاچاق مخه نیول شوې

په نیمروز کې سیمه ییزې سرچينې وايي، د دغه ولایت په کنګ ولسوالۍ کې یې ایران ته د يو شمېر وسلو او نظامي تجهيزاتو د قاچاق مخنیوی کړی دی. د نیمروز د اطلاعاتو او فرهنگ رییس حبیب الله الهام وايي، پرون د عزم ۲۱۵ قول اردو د درېیم کنډک د دویم ټولي سرحدي منسوبینو دوه کسان چې غوښتل یې وسلې او نظامي مهمات له هېواده بهر ته قاچاق کړي د یاد ولایت په کنګ ولسوالۍ کې نیولي دي. نوموړي زیاته کړه دغه وسلې او نظامي تجهیزات په ډېر مهارت سره په يوه کرولا موټر کې ځای پر ځای شوي وو چې د ا.ا ځواکونو له خوا كشف او ضبط شوي او په تړاو یې یوه ښځه او یو سړی نیول شوي دي. د هغه په وینا نیول شوي کسان د لا ډېرو څېړنو په موخه اړوندو ارګانونو ته سپارل شوي دي.