بادغیس کې د یوه کور د خونې چت لوېدو پېښه کې درې کسان مړه شوي

د بادغیس امنیتي مسوولین وايي چې د دغه ولایت اړوند سیمه کې د یوه کور د خونې چت لوېدو له امله د یوې کورنۍ درې غړي مړه شوې دي. د یاد ولایت د امنیې قومندانۍ مسوولینو ویلي چې دغه پېښه د دې ولایت په اب‌کمري ولسوالي کې رامنځته شوې. په خپره شوې خبرپاڼه کې راغلي چې مړه شوي، ټول د یوې کورنۍ غړي دي چې مور او دوو زامنو یې خپل ژوند له لاسه ورکړی دی. د یو بل خبر له مخې په دې ولایت کې د یوه فلانکوچ ډوله موټر د چپه کېدو له امله دوه تنه مړه او څلور نور ټپیان شوي دي. د بادغیس د امنیې قومندانۍ ویاند صدیق الله صدیقي وايي، چې دغه پېښه نن سهار د ابکمري ولسوالۍ په مربوطاتو کې رامنځ ته شوې ده.