تېرو ۶ میاشتو د ۶۰۰ میلیونه ډالرو په ارزښت توکي بهر ته صادر شوي

د روان کال په لومړیو شپږو میاشتو کې د ۶۰۰ میلیونه ډالرو په ارزښت صادرات شوي دي. د سوداګرۍ او پانګونې خونې مسوولین وايي، چې دغه اندازه صادرات یوازې پاکستان سره شوي دي. د خصوصي سکټور غړي وايي، چې د دې صادراتو ډېره برخه وچه میوه، غالۍ، قیمتي او نیمه قیمتي ډبرې جوړوي. دوی زیاتوي چې ورځ تر بلې د هېواد صادرات د پراختیا په حال کې دي. په ورته وخت کې د صنعت او سوداګرۍ وزارت وايي، چې په روان کال کې له پاکستان سره سوداګري او د صادراتو بهیر په منظم ډول پر مخ روانه دی. دوی زیاتوي چې د دواړو هېوادو تر منځ د سوداګرۍ او اقتصادي فعالیتونو د پراختیا لپاره هڅې دې ګړندۍ شي.