خلیلزاد: د بین الافغاني خبرو د پیل لپاره د ځنډ هېڅ پلمه نه ده پاتې

د افغان سولې لپاره د امریکا خاص استازی زلمی خلیلزاد وایي، د بین الافغاني مذاکراتو د پیل لپاره د ځنډ هېڅ پلمه نه ده پاتې. خلیلزاد د قاصد مرکز پر مشرعبدالباقي امین وروستی برید غندلی او وایي اوس ددې وخت دی، چې ټول لوري تاوتریخوالی کم او ژر تر ژره بین الافغاني خبرې پیل کړي. نوموړی وایي، د عبدالباقي امین قاتلین هڅه کوي، په دغه راز کړنو سره د سولې پر وړاندې خنډونه رامنځته کړي. خلیلزاد زیاته کړې، تر ټولو غوره لار داده چې د جګړې شدت راکم او بین الافغاني مذاکرات ژر تر ژره پیل شي. عبدالباقي امین په کابل کې د پوهنې وزارت د علمي شورا رییس وو، چې وړمه ورځ په کابل کې کور ته نږدې په یوه چاودنه کې ووژل شو.