دیني عالمان: د جګړې ښکېل لوري دې نوره جګړه بس کړي

د ختيځ زون ديني عالمان وايي چې د جګړې ښکېل لوري دې نوره جګړه بس کړي. یاد شاوخوا زر ديني عالمان د جلال اباد ښار په شېرزي لوبغالي کې راټول شوي وو او د سولې له روانو هڅو يې ملاتړ څرګند کړ. دوی د جګړې پر ښکېلو لورو غږ وکړ چې سوله وکړي او له جګړو لاس پر سر شي؛ ځکه په خبره يې د جګړو دوام يوازې هېواد په کنډوالو بدلولی شي نه يې پرمختګ ته پرېږدي، نه خپلواکۍ ته او نه يې هم هوساينې ته. دې ديني عالمانو پر حکومت او وسله والو طالبانو غږ وکړ چې لومړی دې دايمي اوربند او بيا دې تل پاتې سولې ته لار هواره کړي. دوی دغه راز ټينګار وکړ که قطر کې د افغان حکومت مرکچي پلاوی وسله والو طالبانو ته قناعت نه شي ورکولی نو هغه هييت دې را وغواړي او پر ځای دې يې ديني عالمان ورولېږي.