رویټرز: ښايي نړیوال له افغانستان سره خپلې مرستې کمې کړي

رویټرز خبري آژانس وايي، چې د امریکا په ګډون نړیواله ټولنه به په جینوا کنفرانس کې، له افغانستان سره خپلې مرستې تر ډیره حده راکمې کړي. رویټرز خبري آژانس د دریو سرچینو له قوله ویلي، چې ښايي نړیوال په جینوا کنفرانس کې له افغانستان سره ډیرو مرستو ته زړه ښه نه کړي. د سرچینې په خبره ښايي دا ځل ډونران د پخوا په نسبت له افغانستان سره د کمو مرستو ژمنه وکړي او هغه به هم د سختو شرایطو پر اساس وي. په عین حال کې ښايي دغه مرستې له کلکو شرطونو سره تړلې وي او د لنډې مودې لپاره به وي. دغو سرچینو د نوم نه ښودلو په شرط رویټرز ته دا هم ویلي، چې امریکا ښايي خپلې کلنۍ مرستې چې، شاوخوا ۸۰۰ میلیونه ډالره ملکي مرستې دي او د دفاع او امنیتي اړتیاوو لپاره په نظر کې پر نیول شویو مرستو اضافه دي، تر ډیره حده راکمې کړي.