د اوبو او برېښنا وزارت: د کونړ پر سيند د بند جوړولو تابيا لرو

د اوبو او برېښنا سرپرست وزیر ویلي، چې د کونړ سينديزې حوزې د اوبو مهارولو په اړه يې تخنيکي سروې بشپړه کړې او په نږدې راتلونکې کې به د اوبو د بند جوړولو قرارداد له يوه ترکي شرکت سره لاسليک شي. د نوموړي په خبره، د دې بند له جوړولو سره به د ګمبیري دښتې ۳۴ زره هکټاره شاړه ځمکه خړوبه او ۴۵ مېګاواټه برېښنا تولید شي. که څه هم د دغه بند د جوړېدو ټولییز لګښت لا نه دی مالوم، خو د اوبو او برېښنا سرپرست وزیر وايي، د تمويل لپاره یې ډونر ته اړتیا نشته او هڅه کوي چې له خپلو داخلې سرچینونو په استفادې د کونړ پر سنديزې حوزې سربېره د ټولو حوزو اوبه مهار کړي. دا په داسې حال کې ده، چې د کونړ پر سیند د اوبو او برېښنا بند جوړښت ستره پروژه بلل کیږي چې سرته رسېدو سره به یې په زرګونه هکتاره شاړه ځمکه خړوبه او ګڼو ولایتونو ته به برېښنا ورکړي او له دې سره به د افغانستان اوبه چې له کلونو راهیسې پاکستان ته وړیا تويېږي، مهار شي او په دې برخه کې به افغانستان ځان بسیاینې ته ورسېږي.