د بهرنیو چارو وزیر د روسیې له سفیر دیمیتري ژیرنوف سره کتلي

د بهرنیو چارو سرپرست وزیر مولوي امیر خان متقي پرون ناوخته په کابل کې د روسیې فدراسیون له سفیر دیمیتري ژیرنوف سره په کتنه کې؛ د افغانستان او روسیې د اړیکو پر نوي پړاو، په کازان غونډه کې پر شویو هوکړو او دوه اړخیزو کاري کمېټو خبرې کړې دي. د سرچینې د مالوماتو له مخې؛ په دې کتنه کې دیمیتري ژیرنوف د بهرنیو چارو وزیر ته د روسیې لپاره د افغانستان د نوماند سفیر د منلو رسمي یادښت سپارلی او هیله یې څرګنده کړې چې د ډیپلوماتیکې کچې په لوړېدو سره به د دواړو هېوادونو ترمنځ اړیکې ګڼو برخو کې پرمختګ وکړي. د بهرنیو چارو وزیر هم، د روسیې له فدراسیون سره د اړیکو نوی فصل مهم بللی او هیله یې څرګنده کړې چې په دغه پړاو کې دواړه هېوادونه وتوانېږي په بېلابېلو برخو کې دوه اړخیزې همکارۍ لا پراخې کړي.