د هېواد په ګمرکونو کې کاري موده ۲۴ ساعتونو ته زیاته شوې ده

مالیې وزارت وایي، چې د هېواد په ګمرکونو کې یې کاري موده له ۱۲ ساعتونو څخه ۲۴ ساعتونو ته زیاته کړې ده. یاد وزارت زیاتوي، اوس مهال په ورځني ‌ډول د هېواد په ګمرکونو ۲زره او ۴۰۰ صادراتي، وارداتي او ترانزیټي محمولې تګ راتګ کوي. یو شمېر سوداګر وايي، په ګمرکونو کې د کاري مودې په غځېدو سره زیاتې استانتیاوې رامنتځته شوي، خو دوی په ګاونډيو هېوادونو غږ کوي، چې د سوداګرۍ د پراختیا په موخه دې د افغان سوداګرو پر مخ د خپلو ګمرکونو دروازې ۲۴ ساعته کړي. په ورته وخت کې ماليې وزارت وايي، ډیر ژر به د ګمرکونو د عصري کولو په لړ کې د هېواد په ۱۶ ګمرکونو کې ۲۴ لوی برېښنايي سکېنرونه هم ولګوي، چې ورسره به د سوداګریزو توکو په طۍ مراحلو کې لا ډيره روڼتیا، چټکتیا او ښه والی رامنځته شي.