سره صليب له افغانانو سره د نړیوالو مرستو د ډېرېدو غوښتنه وکړه

د سره صلیب د نړیوالې کمېټې عملیاتي رییس مارټین شویپ وايي، یوازې بشري سازمانونه نه شي کولی د افغانستان د اوسني بحران بار په اوږو واخلي بلکې پراختیایي سازمانونه هم باید لاس په کار شي او مرسته وکړي. نوموړی وايي، ژمی د ډېرو افغانانو لپاره لا له وړاندې پیل شوی چې د ډیرو خلکو اقتصادي وضعیت یې لا خراب کړی دی. د سره صلیب د نړیوالې کمېټې عملیاتي رییس د افغانانو په ځانګړي ډول د ماشومانو د روغتیايي وضعیت په اړه هم اندېښنه ښيي او وايي، د ماشومانو په منځ کې د خوارځواکۍ او سینه‌ بغل پېښې مخ په زیاتېدو دي. د ملګرو ملتونو سازمان د رسمي شمېرو له مخې، نږدې ۲۰ میلیونه افغانان په همداسې یو وضعیت کې دي چې خوراکي توکو او د سون توکو ته یې لاسرسی ورځ تر بلې سختېږي.