سور صلیب: اقتصادي ستونزو د میلیونونه افغانانو ژوند له خطر سره مخ کړی

د سره صلیب نړیواله کمېټه وايي، د افغانستان د وګړو نیمايي نفوس د خوړو له جدي نه خوندیتوب سره مخامخ دي. دغه سازمان پرون ویلي چې اقتصادي ستونزو او د ژمي رارسېدو په افغانستان کې د میلیونونو کسانو ژوند له ګواښ سره مخ کړی دی. یاد سازمان ټینګار کړی چې د وضعیت خرابېدو مخنیوي لپاره د نړیوالې ټولنې بېړني ملاتړ ته اړتیا ده. د سره صلیب نړیوالې کمېټې عملیاتي مسوول مارټین شوب پر خپله ټویټر پاڼه لیکلي، په افغانستان کې د اساسي توکو بیو لوړېدل، د زیاتو خلکو لپاره د ژوند چارې ستونزمنې کړې دي.  هغه همدارنګه ټینګار کړی چې په افغانستان کې د اړمنو او زیانمن شویو خلکو د ملاتړ زیاتوالی زیات مهم دی. مارټین شوب چې په دې وروستیو کې افغانستان ته په سفر راغلی و، ویلي چې د څو لسیزو جګړو او اقتصادي ستونزو له امله د افغانستان د خلکو ژوند سخت زیان لیدلی دی. د شوب د معلوماتو په اساس په افغانستان کې ۲۴ میلیونه خلک بشري مرستو ته اړتیا لري او نږدې ۲۰ میلیونه خلک د خوړو له کمښت سره مخ دي. د سره صلیب نړیوالې کمېټې عملیاتي مسوول ویلي چې په افغانستان کې زرګونو کسانو خپلې دندې له لاسه ورکړي او ۹۰ سلنه خلک په ورځ کې تر ۱.۹ نه ډالره کم عاید لري.