په افغانستان کې د ګڼو ناورینونو ترڅنګ د حکومتي چارواکو ترمنځ اختلافات یو بل ناورین ګڼل کېږي. سره له دې چې تازه په ټوله نړۍ کې د افغانستان د سولې مسئله تر ټولو تود خبر ګڼل کېږي، خو افغان چارواکي په دې برخه کې یو څه بې پروا دي او په سیاسي کشمکشونو بوخت دي. د چارو شنونکي، سیاسي فعالین او سیاسي ګوندونه په دې باور دي چې د سولې په اړه د افغان سیاسیونو ترمنځ اوسنی پاشلی وضعیت او د ثابت دریځ نه موجودیت د طالبانو په ګټه دی او دوی به له دې ضعف د سولې په خبرو کې استفاده وکړي.
تمه ده چې بین الافغاني مذاکرات ډېر ژر پیل شي، خو په افغان حکومت کې د ننه اختلافاتو اندېښنې پارولې دي. تازه د ولسمشر غني او ډاکټر عبدالله عبدالله ترمنځ چې د حکومت ستر شریکان دي، د ځینو مسایلو پر سر ستونزې او کشمکشونه جوړ شوي دي. تر ټولو لوی کشمکش د ملي مصالحې عالي شورا پر تشکیل را ولاړ شوی دی. بلخوا سیاسی ګوندونه او سیاسي فعالین دغه اختلافونه د هېواد په ګټه نه بولي. د دوی په خبره، دا هر څه کولی شي چې د طالبانو دریځ پیاوړی کړي او دوی به له دې کمزوریو د بین الافغاني مذاکراتو په لړ کې استفاده وکړي.
د سیاسيونو په خبره، د حکومتي مشرانو ترمنځ روان اختلاف له بدمرغۍ پرته بل څه نه شي راوړلی. د افغانستان د ملي همبستګۍ د نهضت مشر سید اسحاق ګیلاني وايي، د حکومتي مشرانو د اختلافونو زیان افغانانو ته اوړي. د ده په خبره: ((ددې اختلافونو دوام له بدمرغۍ پرته بل څه نه دی، دا زموږ ولس ته بدمرغي راولي، دا درد موږ زغمو، بدمرغي پر خلکو ده، دا بدمرغي نه ډاکټر عبدالله ته ده، نه ډاکټر غني ته)).
څو ورځې وړاندې ولسمشر غني یو فرمان صادر کړ چې له ځان سره یې یو اوږد لېست هم درلود او په دې لېست کې راغلي کسان یې د ملي مصالحې عالي شورا غړي بللي وو. د دې لېست تر خپرېدو وروسته ډاکټر عبدالله عبدالله د ولسمشر ددغه کار مخالفت وکړ. دده په خبره ولسمشر حق نه لري چې د ملي مصالحې د تشکیل په اړه فرمان صادر کړي او خلک ورته انتخاب کړي. هغه زیاته کړې چې دا صلاحیت د ملي مصالحې عالي شورا مشر ډاکټر عبدالله عبدالله لري او په دې اړه یې له ګڼو بنسټونو سره بحثونه روان کړي دي. بلخوا ډاکټر عبدالله عبدالله هم تر دې دمه د ملي مصالحې عالي شورا د غړو نوملړ نه دی اعلان کړی. دا ستونزې او کشمکشونه په دې حساسو شرایطو کې د افغانستان په ګټه نه بلل کېږي او سیاسي ګوندونه وایي چې باید ډېر وختي د دې شورا غړي معرفي شوي وای. د محور سیاسي بهیر غړی تمیم نورستاني وایي: ((د دې شورا په اعلام کې ډېر ځنډ راغی. باید وختي یې غړي اعلان شوي وای، اوس باید د شورا غړو کار پیل کړی وای)).
سیاسی فعالین بیا دغه راز وایي چې د ملي مصالحې عالي شورا باید ټولشمونه وي او که داسې و نه شي، نو ښایي د سولې لپاره ګټور ګام نه وي او د ګټې پر ځای به زیان ولري. د ده په خبره: ((که د ملي مصالحې غړي ټولشموله نه وي، دا نو طبعي خبره ده چې خپل منفي تاثیرات لري)).
د سولې کاروان مشر اقبال خیبر بیا د سولې په اړه د حکومت دریځ پاشلی بولي او په خبره یې که وضعیت همداسې وي، نو طالبان چې د سولې په اړه واحد دريځ لري، ښايي د مذاکراتو پر مېز ګټونکي شي. ده په خبره: ((که د افغانستان د حکومت موقف لکه څنګه چې اوس دی، همداسې پاتې شي، همداسې پاشلی وضعیت ولري، نو په مقابل کې یې د طالبانو نظر واحد دی، نظر یې واحد دی نو ښایي ګټونکي شي)).
سیاسیون داسې مهال د سولې په اړه د افغان حکومت پر پاشلي دریځ نیوکې کوي چې ټاکل شوې په نږدې راتلونکې کې بین الافغاني خبرې پيل شي او د افغان حکومت مذاکراتي پلاوی به له طالبانو سره مخامخ بحثونه پيلوي.
