فنلنډ: افغانستان کې روانه وینه بهېدنه باید ختمه شي

د فنلنډ د بهرنیو چارو وزیر پیکا هاویستو ویلي چې په افغانستان کې روانه وینه بهېدنه باید ختمه شي. نوموړی چې د یو فنلنډي پلاوي په مشرۍ کابل ته راغلی دی دا څرګندونې یې نن له ولسمشر غني سره په لیدنه کې کړې دي. د فنلنډ د بهرنیو چارو وزیر په افغانستان کې د وروستیو پېښو له امله خپله خواشیني څرګنده کړې او زیاته کړي یې ده چې په افغانستان کې روانه وینه بهیدنه باید ختمه شي، ځکه فنلنډ او نړیواله ټولنه په دغه هېواد کې سولې ته هیله من دي. هغه زیاته کړې، نړیواله ټولنه به د افغانستان د ښه راتلونکي لپاره په جینوا کنفرانس کې یو ځل بیا له افغان حکومت او خلکو څخه خپل پیاوړی سیاسي او مالي ملاتړ اعلان کړي. نوموړي دغه راز د تېرو لاسته راوړنو پر ساتنې هم ټینګار کړی دی.