لغمان کې د کرنیزو اوبو د څلورو زېرمو د جوړولو چارې پیل شوې

د لغمان د کرنې، اوبولګولو او مالدارۍ مسوولین په قرغیو ولسوالۍ کې د کرنیزو اوبو د څلورو زېرمو د جوړولو چارو د پیل خبر ورکوي. د یاد ولایت د کرنې، اوبولګولو او مالدارۍ رییس محمد ولي محسن وايي، چې دغه زېرمې د قرغیو ولسوالۍ اړوند ګندهاب سیمه کې د لمریزې برېښنا سېستم په لرلو سره د ملګرو ملتونو د خوړو او کرنې ادارې په مالي ملاتړ د ۵۰ زره امریکايي ډالرو په لګښت جوړېږي. محسن زیاته کړه، چې د دې پروژې په پلې کولو سره به ۲۰ هکتاره ځمکه خړوبه، نږدې ۶۶ زره نوي نیالګیو ته به د کښت زمینه برابره او دغه راز به ۱۰۰۰ کورنۍ ترې په مستقیمه او غیر مستقیمه توګه ګټه واخلي.